26.05.2020, 12:19
Қараулар: 127
ЖҰЛДЫЗДЫҚ ТҮЛЕКТЕРДІҢ ТАРТУЫ

ЖҰЛДЫЗДЫҚ ТҮЛЕКТЕРДІҢ ТАРТУЫ

«Кіндігімнің жас қаны,
Тамған жерім ауылым.
Шабытымның асқары,
Самғаушы еді ауылым деп»,- ақын ағамыз жырлағандай «ауыл» деген сөзді естігенде менің өне бойымды қуаныш кернейді.

Туған жерім аудан орталығынан шалғай жатса да жыл сайын көркейіп, гүлденіп келеді. Қандай жағдай болса да берекелі ауыл қаланың  қымқуат тірлігіне үдере көшпеді. Керісінше жылдар жылжыған сайын әсем үйлер көше бойлап, аппақ қаздай тізіліп тұр. Жұлдызымның көркіне көз тояды. Әр үйдің ауласынан асыр салып ойнаған баланы көргенде балалықтың көрінісі ерiксiз ойға оралады. Төскейде малы өрген, даласын қуанышты үн кернеген ауылымның осынау көрінісі маған ерекше ыстық әрі қымбат.

Туған жердің әр түлегі алыста жүрген перзенттерді оң жаңалықтармен қуантуда. Жұлдыздық  жастар  қашанда туған жерді гүлдендіруді перзенттік борышымыз деп санайды.  Бүгінде, ұрпақ сабақтастығының көрінісі мектеп бітіргендеріне 5 жыл, 10 жыл, 20 жыл, 30 жыл толған түлектер кездесіп, өздерінің сый-құрметтерін туған жеріне, алтын ұя мектебіне ерекше ықыластарын білдіріп жатады.

Биыл, Батыр атындағы білім ордасын 2010 жылы бітірген түлектерге – 10 жыл. Сыныптай сырғып өткен уақыттың жүйріктігіне қарап таң боласың?! Арман аясында, межелі мақсат жолында сан тарапқа аттанған түлектер  бүгінде еліміздің түкпір-түкпірінде еңбек етіп жатыр. 1992 жылы туған түлектер әр жерде табысты қызметтер атқарып, бедел биігінен көрініп жүрсе де перзенттік парыздарын ұмытпады.  Түлектер мақсаты бір арнаға тоғысып, туған жерге сый жасады. 10 жылдық түлектер ауыл ішіне заманауи үлгідегі жарық шамдармен көмкерілген «Туған жерім Жұлдыз» атты конструкциялық белгі орнатып, жерлестерін қуантты.

— Бұндай игі істер біздің ауылымызда біраз уақыттан бері жүзеге асып келеді. Қаншама түлек ауылдан жырақта жүр. Әлбетте әрқайсысының жүрегі елім, жерім деп соғады. Кіндік қанымыз тамған жерді көркейту біздің борышымыз. Сондықтан да еш ойланбастан былтырдан бастап ақша жинап, қолға алдық. Нәтижесінде 1 млн қаражат жиналды. Игі істің жүйелі жүзеге асуы түлектердің  ауызбіршілігі пен татулығының септігі деп білеміз. Жасалған жұмыстардың жалғасы ретінде келесі эстафетаны 1993 жылы туылған жастарға жолдаймыз, -дейді  Әліби Тасқалиев.

Қазақ баласын қара домалақ бал шағынан бастап қалың қаланың күйбең өміріне дайындап, қара шаңырақтың қашанда биік екендігін қанға сіңірген қасиетті жер – ауыл. Есейіп, өмірден өз жолыңды тауып, уақыт ағынымен алыстарға шарықтап кете барсаң да, қайта айналып келуге мәжбүрлейтін де – ауыл. Себебі, ауылдағы қара топырақтың киесі , ошақ-самаурыннан бұрқыраған нағыз қазақылықтың иісі қазақ баласының өмірімен шексіз байланыстыратындай.

«Елдің қамын ойлаған ерте өседі» ,-дейді Мұзафар Әлімбаев атамыз. Туған жердің  қадірі асып, мәртебесі таси  берсін дейтін жұлдыздықтардың ұраны лайым да солай болмақ. Туған жерімді қалай мақтасам да жарасымды. Көркейіп, құлпыра бер, туған өлкем!

Ел игілігіне арнаған іске ұйытқы болған 10 жылдық түлектерге  айтар алғысымыз шексіз.

Жұлдыз Асқар