АЙМАҚ

СПОРТ

ҚОҒАМ

Құттықтаулар

Мұрағат: Май, 2018


ҚЫРШЫН КЕТКЕН ЖАЛПАҚТАЛДЫҚ БОЗДАҚТАРДЫ ЕСКЕ АЛДЫ

Күні: , 86 рет оқылды

Жыл сайын 31 мамырда саяси қуғын-сүргін құрбандарын еске алып, жазықсыз жапа шеккендердің аруағына құран бағышталады. Биыл да Жалпақтал ауылындағы орталық саябақтағы «Қазақ халқын қорғаушылар одағы. Жалпақтал жасырын жастар ұйымы» атты ескерткіш тақтаға көп адам жиналды. Шараға ауыл әкімі Самиғолла Ақмурзин, мекеме-кәсіпорын басшылары, қуғынға ұшыраған азаматтардың ұрпақтары, ардагерлер, еңбек ұжымдары, ауыл тұрғындары қатысты. Гүл шоқтарын қою рәсімін жасап, бір минут үнсіздікпен еске алды. Саяси қуғын-сүргін құрбандарына арналған ескерткіш жанындағы шара қаза болғандардың аруағына Жалпақтал ауылдық мұсылмандар мешітінің имамы Тілепберген қажы Нұралиев құран бағыштап, дұға оқыды. Жиында округ әкімі Самиғолла Сафиоллаұлы, Жалпақтал аграрлық және салалық технологиялар колледжінің директордың оқу ісі жөніндегі орынбасары Жасұлан Ғұмаров, аудандық ақсақалдар алқасының төрағасы Нағым Ризуанов сөз сөйлеп, бүгінгі бейбіт күнді арман етіп, соның жолында құрбан болған тұлғаларды еске алды. Ақ тілектерін арнады. Кейін Жалпақтал ауылындағы жастар демалыс орталығында саяси қуғын-сүргін құрбандарын еске алу күніне орай ««Холо́дное ле́то пятьдеся́т тре́тьего…» атты кинофильм көрсетілді. Іс-шараның мақсаты келешек ұрпаққа осы қанқұйлы жылдардың оқиғасы, оның жазықсыз құрбаны болған азаматтардың есімдерін ұмытпау, оларды мәңгі есте сақтау болатын.

Тұрарбек АҚМЫРЗА


ОТБАСЫЛЫҚ АНСАМБЛЬМЕН КЕЗДЕСКЕН КҮН

Күні: , 96 рет оқылды

30 мамыр күні Елбасының «Болашаққа бағдар: рухани жаңғыру» бағдарламасы аясында «Рухани жаңғыру» залында кездесу өтті. Кездесудің кейіпкерлері – облыстық «Мерейлі отбасы — 2016» ұлттық байқауының жеңімпаздары Биғалиевтер отбасылық ансамблі. Еңбек пен өнерді қатар алып жүрген отбасылық ансамбльге биыл 40 жыл. Осы жылдар ішінде Биғалиевтер отбасы қиын кезеңдерден өтсе де, бір шағын мемлекеттің іргетасын берік сақтады. Кездесуге келген Марат аға мен Нұржамал апа жастық шақтарын еске түсіріп, өнер мен өмір жолдарындағы естеліктерімен бөлісті. -Мен Ақтөбе қаласындағы байланыс және электротехника техникумында білім алып, Алматыда жұмыс жасадым. Алматыда жұмыс жасап жүріп, Нұржамалды кезіктірдім. Сөйтіп, 1978 жылы отбасын құрдық. Әкемнің, -балаларым, ауылға келіңдер! -деген сөзін тыңдап, барлық армандарымызды Алматыға қалдырып, ауылға қайттық. Бірақ апаларыңыз сол кезде де ештеңеге қарамастан қаланың қызымын демей, ауылдың тірлігіне араласып кетті. Балаларымызға кішкентайларынан құлақтарына әннің әуенін құйып, түрлі аспапта орындауды үйреттік. Барлығы да өнерге жақын болды. Осылайша 1986 жылы отбасылық ансамбль құруға бекіндік. Дегенмен ауылдық жерде құр ән салумен өмірлік нәпақаны айырудың қиын екендігі белгілі. Бірақ біз сол өнермен бірге ата-бабамыздың кәсібі — мал шаруашылығын қатар алып жүріп, өз еңбегімізбен шаруа қожалығын ашып, кәсіпкерлікті өрістеттік. «Еңбек етсең, емерсің» деген қазіргі уақытта кенже ұлымыз Рустам «Рустам» шаруа қожалығына жетекшілік етіп, мал шаруашылығы тұқымын асылдандырумен айналысып келеді. Ал қалған балаларымыз да қаладан кәсіп ашып, еңбектерін елге, қала берсе қайырымдылық шараларына тигізуде, -деді Марат ағамыз. Ал үйдің Отанасы Нұржамал апаның бұл ісіне таңғалмай кетуге болмас. Апай өзінің әңгімесінде: -Бұл ауылдың топырағына ештеңе өспейді, -деген ауыл адамдарының сөзіне мән бермей, аула ішіне жеміс-жидек егіп, бақша салғанмын. Сол бақшамда жемістердің түр-түрі өсті, -деді. Міне, маңдай терімен ауласын жасыл желекке бөлеп, дастарханын көкөніс пен жеміс-жидекке толтырған Нұржамал апа адам шын ниетімен еңбектенсе, нәтиже шығатынын ауыл адамдарына осылайша дәлелдеген болатын. Отағасымен бірге өмірдің барлық ыстық-суығына төзіп, бар ауыртпалықты көтерген анамызға қызыға қарадық. «Өмірдің мәні — бала, сәні — бала» деп, үш ұл, үш қыз өсіріп, бүгінде «Күміс алқаны» тағып, Марат аға екеуі ақылшы ата мен асыл әже атанып отыр. Кездесуге келгендер де өнерлі отбасының өнегелі жолдарының естеліктерін ұйып тыңдады. Әнмен өрілген әдемі кеште жастар атынан өнерлі отбасына өлеңдер оқылып, әндер де шырқалды. Марат аға мен Нұржамал апа алдағы жоспарларымен де бөлісіп, жақын арада Қазталов сахнасына отбасылық концерт қоятындарын да жеткізді. Кездесуге жиналғандар отбасылық ансамбльдің қос бәйтерегіне ақ тілектерін айтып, естелік сыйлық табыстады.

Жұлдыз АСҚАР


ГЕНДІРЛІК ТЕҢДІКТІ ҚАЛЫПТАСТЫРУ БАҒЫТЫНДАҒЫ СЕМИНАР

Күні: , 100 рет оқылды

Ұлтымыздың көшбасшысы Н.Ә.Назарбаев өз сөзінде: «Біз елімізде әйелдің рөлін арттыру үшін әрі қарай жағдай жасай бермекпіз. Заманауи қазақстандық әйел қызметтік мәртебеге, еңбек мансабына ұмтылуы тиіс. Әйелдерді мемлекеттік және қоғамдық басқару ісіне белсенді түрде баулу керек. Мен үшін әр қазақстандық отбасының берекесі мен қарапайым адамдардың ертеңгі күнге деген сенімі маңызды. Біздің бағдарламаларымыздың барлығы дәл осыған бағытталған»,-деп, еліміздің нысаналы мақсаттарының бірін айқындап берген болатын. Осы орайда бүгінде Қазақстандағы ішкі саясаттың бір құрылымы ретінде «гендерлік саясат» деген ұғым көп мәселелерді көтеріп жүр. Қазіргі қоғамда гендер саласындағы сан қырлы күрделі мәселелерді түсіндіру үшін, ер де, әйел де өзінің құқықтарының тең екендіктерін сезіну үшін арнайы қоғамдық бірлестіктер арқылы түсінік жұмыстары жүргізіліп, жоспарлы іс-шаралар қолға алынуда. Осыған сәйкес 30 мамыр күні аудандық ішкі саясат бөлімінің басшысы Самал Қанапияқызының төрағалық етуімен «Еліміздегі гендерлік теңдіктің қалыптасуы мен ерекшелігі» тақырыбында семинар-тренинг өтті. Семинарда аудандық ішкі саясат бөлімінің басшысы «Қазталов ауданы жанындағы әйелдер істері және отбасылық-демографиялық саясат» жөнінде атқарылған жұмыстарды баяндады. Сондай-ақ семинарда БҚО «Жайық дауысы» қоғамдық бірлестігінің төрайымы Қадиша Мұқанова, БҚО ішкі істер департаментінің полиция майоры Шынар Қапаева, гендерлік саясат, қоғамдағы зорлық-зомбылық факторларының алдын алу шаралары жөнінде әңгіме өрбітті. Мемлекетіміздің ұлт саулығы жөніндегі бағдарламадан бастап әйел адамдарға қатысты барлық заңды екшеп берген Қадиша Халыққызы отбасы мәселесіне тоқталды. Оның айтуынша, жыл сайын елімізде некелескен отбасылардың дені ажырасып кетеді және жалғыз басты аналар қатары жылдан-жылға көбейіп отыр. Бұл ащы да болса шындық, -деді өз сөзінде. — Әйел заты әрқашан да өмір үшін, адамгершілік үшін күрескен. Біз өзгерістер заманында өмір сүріп жатырмыз. 2009 жылы ерлер мен әйел адамдардың арасындағы гендерлік тепе-теңдікке мемлекеттік кепілдік жайлы және әйелдерге қатысты жасалынатын тұрмыстық зорлық-зомбылықтың алдын алу туралы екі гендерлік заң қабылданған болатын. Қазіргі қоғамда дұрыс гендерлік ұстаным болу қажет, -деген Орал қаласы әйелдерге арналған әлеуметтік бейімделу және оңалту орталығының директоры Ганди Шамкелова тұрмыстық зорлық-зомбылық түрлері жайлы көптеген мәліметтер айтты. Семинарда жалпы аудан көлеміндегі әйелдің тыныс-тіршілігі жөнінде аудандық аналар кеңесінің төрайымы Нұрия Хабибуллина хабарлама жасады. Семинар барысында қатысушылар сұрақтар қойып, өз-ойларын ортаға салды.

Жұлдыз АСҚАР


«АЙГӨЛЕК — 2018»

Күні: , 104 рет оқылды

30 мамыр күні аудандық мәдениет үйінде балалар шығармашылығына арналған аудандық «Айгөлек — 2018» балалар байқауы өтті. Байқауда вокал, би жанры бойынша бүлдіршіндер өз өнерлерін ортаға салды. Тек бір өкініштісі бұл байқауға үміткерлердің аз қатысуы болды. Байқаудың нәтижесінде вокал жанры бойынша 1 орынды Ақпәтер ауылынан келген Айсәуле Талғатқызы, 2 орынды Жаңатаңнан келген Дильназ Рафхатова жеңіп алса, 3 орыннан көктеректік Іңкәр Серікқызы көрінді. Ал би жанры бойынша сынға түскен биші бүлдіршіндер арасында 1 орынға ақпәтерлік «Жастолқын» бишілер тобы, 2 орынға қайыңдылық «Қызғалдақ» бишілер тобы ие болса, 3 жүлделі орынды Талдықұдық ауылынан келген «Балдәурен» бишілер тобы өз қанжығаларына байлады. Жүлделі орын алған жеңімпаздарға дипломдар мен естелік сыйлықтар табыс етілді.

Қайрат ЖАҚЫП


«МЕН ҚАЗАҚПЫН» МЕГАЖОБАСЫ АУДАНДА

Күні: , 112 рет оқылды

Елбасымыз Н.Назарбаев өзінің бір сөзінде домбыраның үніне ұйымаған, жусанды даланың иісін аңсамаған қазақты қазақ деу қиын деген екен. Иə, расында да ұлттық үніміз , əуезді əніміз, əкенің қанымен, ананың сүтімен əдет-ғұрып, салт-дəстүр, ғажап мəдениетіміз əлемнің теңдесі жоқ жауһары деп білеміз.
Бүгінгі таңда ұлттық рухани мұрамыз əн мен күйді, терме орындаушы жастарымыздың шеберлігін шыңдау мақсатында «Мен қазақпын» телевизиялық мегажобасы бастау алған болатын. Бұл мегажобада біздің ауданымызға келіп, нағыз таланттыларды анықтады. 29 мамыр күні аудандық мəдениет үйінде «Мен қазақпын» жобасының аудандық іріктеу кезеңі өтті. Жобаның ашылу салтанатында аудан əкімінің орынбасары Зəйлім Мəжитова сөз алып, қатысушыларға сəттілік тіледі. Байқауға 8 үміткер қатысты. Жоба соңында облыстық халық шығармашылығы орталығының «Халық шығармашылығы» бөлімінің басшысы Есенгелді Молдағалиев байқауға қатысушы Ержан Құмарғалиев, Мұрат Ахметов, Гүлзия Жанғалиева, Асылжан Оразаевтарға облыстық кезеңге жолдама алды. Байқауға қатысқан басқа да үміткерлеріміз алғыс хатпен марапатталады.

Жұлдыз АСҚАР


АУЫЛ ШАРУАШЫЛЫҒЫ, ВЕТЕРИНАРИЯ ЖӘНЕ ЖЕР ҚАТЫНАСТАРЫ МӘСЕЛЕЛЕРІ БОЙЫНША КЕҢЕС ӨТТІ

Күні: , 108 рет оқылды

29 мамыр күні аудан әкімі Абат Шыныбековтің төрағалық етуімен ауыл шаруашылығы, ветеринария және жер қатынастары мәселелері бойынша кеңес өтті. Кеңеске ауылдық округ әкімдері, мекеме-бөлім басшылары қатысты. Кеңесті ашқан аудан әкімі, -бүгінгі жиналып отырған басты себеП– ауыл шаруашылығы, ветеринария және жер қатынастарының атқаған жұмыстарымен алда тұрған міндеттерін саралау, -деді. Кеңесте аудандық ауыл шаруашылығы бөлімінің басшысы Сергей Тоқпанов «Ауданның ауыл шаруашылығы саласында 2018 жылдың өткен кезеңінде атқарылған жұмыстар және алда тұрған міндеттер туралы» хабарлама жасады. -Аудан бойынша ауыл шаруашылығы саласында 31 заңды тұлға, 616 шаруа қожалықтары тіркелген. Есепті мерзімге шаруашылықтардың барлық санаттарындағы ірі қара малы 88594 басты құрайды. Бүгінде ауданда асыл тұқымды ірі қара малын өсірумен 11 шаруашылық, қой өсірумен 3 шаруашылық және жылқы өсірумен 3 шаруашылық айналысуда. Сондай-ақ мал шаруашылығы бойынша аудан шаруашылықтары субсидия алуға берген өтінімдеріне сәйкес 342 млн. 389 мың теңге көлемінде қаржыландырылған. Субсидия көлемі бойынша ең төменгі көрсеткішті Болашақ округі (0 теңге), Қарасу (300 мың теңге), Талдықұдық (1 млн. 250 мың теңге), Қайыңды округі (2 млн. 350 мың) көрсетіп отыр. 2017-2018 жылғы қыс маусымының ұзарып кетуіне байланысты ауданның кейбір ауылдық округтері мен шаруашылықтарында мал азығының тапшылығы орын алып, шөп тасымалы ұйымдастырылды. Осы жағдайдан тиісті қорытынды шығару мақсатында мал азығының жылжарымдық қорын жасақтау үшін әрбір округке тапсырмалар беріліп, аудан бойынша жалпы 350,0 мың тонна табиғи мал азығын дайындауымыз қажет. Сонымен қатар маусымдық қой қырқу жұмыстары жүзеге асырылуына байланысты мамыр айының 23-25 күндері аралығында Атырау қаласының жүн өңдеу фабрикасы «Сaspiy lana Atyrau» ЖШС –мен келіссөздер жүргізіліп, барлық ауылдық округтерге жүн қабылдау жөнінде толық мәліметтер берілді, -деді хабарламашы өз сөзінде. Сондай-ақ кеңесте аудандық ветеринария бөлімінің басшысы Аманжол Қажығалиев хабарлама жасап, ветеринариялық іс-шаралардың орындалуы бойынша ағымдағы жылдың 5 айында атқарған жұмыстары туралы айтып өтті. — Ветеринария бөлімімен жоспарға сай, құтыру ит, пастереллез, сібір жарасы, бұлдырмақ ісік және т.б. ауруларға қарсы вакцинациялау жұмыстары жүргізіліп келеді. Бруцеллез ауруына қарсы 5 айлық жоспарға сай ауданда 43951 басқа бекітілсе орындалғаны 31978 бас ірі қара малы серологиялық тәсілімен зерттеліп(72,8%), 569 бас оң нәтиже беріп, зақымдану – 1,8 % құрады. Содан 301 бас санитариялық сойылымға тапсырылды. Қалған бас ірі қара малды санитариялық сойылымға тапсыру ұйымдастырылуда. Ұсақ қара малы бойынша 70260 басқа бекітілсе, 24845 бас зерттеліп (орындалу – 35,4%), оң нәтиже анықталғаны 53 бас. 64 түйеден қан алынып, 3 түйе оң нәтиже берді және 55 иттен қан алынып, оң нәтиже берген 7 ит аластатылды, -деді хабарламашы. Сонымен қатар кеңесте аудандық жер қатынастары бөлімінің басшысы Артур Айтжанов та өз саласы бойынша атқарылған жұмыстардан хабарлама жасады. Кеңесті қорытындылаған аудан әкімі Абат Абайұлы тиісті сала басшыларына тапсырмалар жүктеді.

Мөлдір ӘНУАРБЕКҚЫЗЫ


«МЕДИАЦИЯ – ДАУЛАРДЫ ШЕШУДІҢ БАЛАМАСЫ»

Күні: , 110 рет оқылды

29 мамыр күні «Нұр Отан» партиясының мәжіліс залында аудан әкімі Абат Шыныбековтің төрағалық етуімен «Медиация – дауларды шешудің баламасы» атты дөңгелек үстел өтті. Дөңгелек үстелге аудандық сот төрағалары, кәсіби және кәсіби емес медиаторлар, округ әкімдері, бөлім басшылары қатысты. Дөңгелек үстелде сөз алған аудан әкімі Абат Абайұлы: — Қазіргі таңда Қазақстанда медиация институты жұмысы белсенді түрде жүргізілуде. Президент Н.Назарбаевтың Жарлығымен ҚР «Медиация туралы» Заңы да қабылданды. Осы орайда ауданымызда 2016 жылдан бастап күні бүгінге дейін кәсіби, кәсіби емес медиаторлардың қатысуымен 262 іс медиация тәртібімен қаралып, оң шешімдерін тапқан. Медиаторлармен қаралған істердің дені құқықтық болып келеді. Осы кезге дейін 8 ауылдық округ бойынша 12 кәсіби емес медиатор жұмыс жүргізсе, қазіргі кезде 1 кәсіби медиатор, 16 ауылдық округ бойынша 22 кәсіби емес медиаторлар жұмыстарын бастады. Кәсіби емес медиаторлардың саны бойынша ең көбі Жалпақтал ауылдық округінде – 4 медиатор. Соның ішінде жоғары белсенділікпен жұмыстарын атқарып отырған кәсіби емес медиаторлар – Абылай Молдашев, Ғилым Едекешов, Шымболат Өтешқалиев, Айсұлу Иманғалиеваны атап өтуге болады, -деді. Дөңгелек үстелде ауданымыздағы кәсіби медиаторы Марат Тоясов, аудандық сот төрағасының міндетін атқарушы Ұмсын Мұқанғалиева, №2 аудандық сот төрағасы Айбар Бижанов, кәсіби емес медиаторлар Абылай Молдашев, Ғилым Едекешов, Айсұлу Иманғалиева өз ой-пікірлерімен бөлісіп, ұсыныстарын айтты. Мәселен, кәсіби емес медиаторлар санын арттыру, медиаторлардың медиаторлықты растайтын құжаттармен қамтылуы, шешендік, олардың арасында сөз саптауды жетілдіру, жеңіл, орташа қылмыстарды сотқа дейін жеткізбей шешу мәселелері айтылды. -«Дау мұраты – біту» деп Сырым бабамыз айтқандай, қазақ халқы үшін бітімгершілік – билік айтудың ең озық өнегесі. Тоқсан рулы елдің дауларын тоғыз ауыз сөзбен түйіндеп, татуластырып отырған дана бабаларымыздың бітімгершілік саясаты егеменді елімізде жаңа серпінмен қолға алынуы құптарлық жайт. Ауданда ашылған медиация кабинеті де алдағы уақытта халық игілігіне жұмыс жасап, дауларды шешуге, келісімді нығайтуға арналған орын болатынына сеніміміз мол. Медиаторлар тарапынан тиісті жұмыс жоспары жасақталып, жергілікті атқарушы органдармен бірлесе жұмыс жүргізілуі тиіс,- деді дөңгелек үстелді қорытындылаған аудан әкімі.

Мөлдір ӘНУАРБЕКҚЫЗЫ


МЕДИАЦИЯ КАБИНЕТІ АШЫЛДЫ

Күні: , 130 рет оқылды

29 мамыр күні ауданымызда «Әлеуметтік қызметтер, бизнес және демалыс орталығында» медиация кабинеті ашылды. Кабинеттің ашылу салтанатына аудан әкімі Абат Шыныбеков, ауылдық округ әкімдері, аудандық соттардың судьялары, кәсіби және кәсіби емес медиаторлар қатысты. Медиция кабинетінің ашылуында сөз сөйлеген аудан әкімі Абат Шыныбеков: -Медиация заңының қолданылу мақсаты – бұл дауласушы тараптарды сотқа жеткізбей-ақ өзара бітімге келтіру, даулы мәселелерді бітімгершілікпен шешу болып табылады. Осы орайда ауданымызда халық арасында медиация түсінігін қалыптастыру, заңның тиімділігін ұғындыру мақсатында бүгін әдістемелік нұсқаулықтармен жабдықталған медиация кабинеті ашылып отыр. Енді осы кабинет ауыл азаматттары арасындағы өзара түсініспеушілікті жоятын, елдің бірлігін нығайтып, дауларды азайтатын орынға айналып, халық игілігі үшін жұмыс атқарады деп сенеміз, -деген тілегін жеткізді. Жаңадан ашылған медиация кабинетінің лентасын аудандық сот төрағасының міндетін атқарушы Ұмсын Мұқанғалиева мен кәсіби емес медиатор Шынболат Өтешқалиев қиды. Айта кетейік, аудамызда биылдан бастап 1 кәсіби медиатор Марат Харесұлы Тоясов қызметін бастаса, ауылдық округтерде 22 кәсіби емес медиаторлар жұмыс жасауда.

Мөлдір ӘНУАРБЕКҚЫЗЫ


ТЕРІС АҒЫМДАРДЫҢ АЛДЫН АЛСАҚ…

Күні: , 102 рет оқылды

Бүгінгі күнде әлемді лаңкестік қаупі алаңдатуда. Әлем елдері осы бір сұмдық құбылыспен күресуде. Мыңдардың өмірін жалмайтын неше түрлі лаңкестік әрекеттер қай жерден болса да көрініс беріп қалып жүр. Осы орайда терроризмге қарсы күресте бүкіл әлем бірігіп жұмыс жасауда. 28 мамыр күні облыстық терроризмге қарсы комиссия жанындағы жұмыс тобының отырысының мәжілісінің хаттамасына сәйкес спорт саласындағы деструктивті діни ағымдардың алдын алу мақсатында аудандағы спорт мектебінің және Қазталов, А.Оразбаева мектептерінің спорт пәніне сабақ беретін мұғалімдерімен кездесу өткізілді. Кездесуде аудандық жастар ресурстық орталығының маманы, теолог, «Ақниет» қоғамдық бірлестігінің төрағасы Есбол Сақауов спорт саласында жұмыс жасайтын қызметкерлердің деструктивті ағымдардан сақ болулары жөнінде және теріс ағымдарға қарсы әрекет жасау туралы әңгімеледі. Кездесу барысында спортшылар өздерінің толғандырып жүрген сауалдарын қойып, жауаптар алды.

«Ауыл айнасы» ақпарат


ЖАЛПАҚТАЛДА 1998 ЖЫЛҒЫ МЕКТЕП ТҮЛЕКТЕРІ «СТРИТ ВОРКАУТ» ЖАТТЫҒУ СПОРТ АЛАҢЫН СЫЙҒА ТАРТТЫ

Күні: , 172 рет оқылды

25 мамыр күні Жалпақтал ауылында 1998 жылғы түлектердің тартуымен құны 4 миллион теңге тұратын “СТРИТ ВОРКАУТ» жаттығу спорт алаңы ашылды. Ашылу салтанатында сөз алған аудан әкімі Абат Шыныбеков: -Бәріңізді ашылып отырған жаңа заманауи жаттығу спорт алаңымен құттықтаймын. Сіздердің күштеріңізбен, демеушілігіңізбен жасалған тартуларыңыз елдің, ауылдың дамуына қосқан үлкен үлес деп білеміз. Сіздерге мың алғыс, 1998 жылғы түлектер, -деді. Сонымен қатар ҚР еңбек сіңірген жаттықтырушысы Нұрлан Қауметов те түлектерге алғысын жеткізді. Түлектер атынан сөз алған Сенім Раxметуллин түлектердің туған жерге деген тілегін білдірді. Спорт алыңының лентасын аудан әкімі Абат Абайұлы мен 1998 жылғы түлектер атынан Амангелді Жолдыбайұлы қиды. Жарайсыздар, 1998 жылғы түлектер!!! Туған жерді түлетуге қосқан үлестеріңізге ел риза!

Мөлдір ӘНУАРБЕКҚЫЗЫ


Қазталов ауданы, Шарафутдинов көшесі 13
zhaik_presscenter@mail.ru
aulainasi@mail.ru

"Ауыл айнасы"

"Ауыл айнасы" газетінің бас редакторы: 8-71144-31-4-68
Тілшілер: 31-4-68, 21-3-70
Жарнама бөлімі: 21-0-42

 

.