АЙМАҚ

СПОРТ

ҚОҒАМ

Құттықтаулар


СТУДЕНТТЕР БАС ҚОСЫП, ЖОСПАРЛАРЫМЕН БӨЛІСТІ

Күні: , 6 рет оқылды

17 шілде күні «Рухани жаңғыру» кеңсесінде аудан жастарының ұйымдастыруымен «Асулардан асады жастар əлі, зор болашақ бүгіннен басталады» тақырыбында студенттермен кездесу өтті. Кездесуде Қазақстанның əр оқу орнында білім алып жатырған студенттер қатысты. Орталыққа бас сұққан студенттерге «Рухани жаңғыру» жобалық кеңсесінің маманы Айбек Көшеғалиев Елбасының «Болашаққа бағдар:рухани жаңғыру» бағдарламасы аясында ауданда атқарылған жұмыстарды таныстырды. Кездесу барысында Астананың құрдасы, Астана медицина университетінің студенті Анджелика Сəбитовамен «Сыр сұхбат» ретінде жүргізілді. Астананың түлегі Анджелика арман қала Астананың түлегі болғанын мақтанышпен айтып, сол жердегі болашақ жоспарларымен бөлісті. Шарада басқа да оқу орынның студенттері болашақта жастар саясатын көтеру аясында жастармен бірге жұмыстануға дайын екендіктерін білдіріп, тың идеяларын ортаға салды. Кездесу соңында Алматы техникалык университетінің студенті Руслан Науханов: -Мен ауылымды сағынып келгенде өзімнің замандастарыммен кездесіп, осындай кездесуде отырғаныма қуаныштымын. Бұрын мектептерде бас қосадық едік. Қазір міне «Рухани жаңғыру» кеңсесіндегі ұлттық құндылықтарымызды жаңғыртқан көптеген дүниелерді тамашалап, рухани азық алып отырмыз. Бүгін сіздермен бірге біраз жоспарлар құрып, еркін əңгімелестік. Болашақта ауылда келген студенттердің, басқа да жастардың басын қосатын орындар ашылса деген ұсынысым бар, -деді. Иə, кездесуде студенттер аудандағы жастар саясатының дамуына өз үлестерін қосатынын айта келіп, əр аптада екі рет бас қосып кездесетіндерін жеткізді.  


ҚҰРЫЛЫС НЫСАНДАРЫН АРАЛАДЫ

Күні: , 4 рет оқылды

Ауданымыз бойынша былтырғы жылды есепке алмағанда биылғы жылдың өзінде құрылыс жұмыстары қарқынды жүруде. Мемлекеттік «Ақбұлақ» бағдарламасы бойынша елді мекендерге ауыз су жүйелері іске қосылып жатырса, аудан орталығы Қазталов ауылында саз мектебінің құрылысы, Жалпақтал ауылында 12 пәтерлі тұрғын үйдің құрылыс жұмыстары, Көктерек, Талдыапан, Талдықұдық бағыттары бойынша көгілдір отын тарту жұмыстары атқарылуда. Ал қатқыл табанды жол төсеу жұмыстарына келсек, облыс орталығынан тартылып келе жатырған жолдың құрылысы биыл жалғасын тауып жатыр. Жалпақталдан асқан жол құрылысы да жанданып, Қазталов бағытында 35 шақырым қашықтық жасалып жатыр. Сонымен қатар Жаңажол ауылының кіреберіс, шығаберіс және ауылішілік жолдарына қатқыл табанды жол төселіп, жаяу жүргіншілер жолы да істелуде. Ал Қазталов және Жалпақтал ауылдарына ауылішілік жолдар салынады деп күтілуде. Осыған орай 17 шілде күні аудан әкімі Абат Шыныбеков Жалпақтал, Жаңажол ауылдарында болып, құрылыс нысандарын аралады. Жалпақтал ауылындағы «Ақбұлақ» бағдарламасы аясында тартылып жатырған ауыз су жүйесінің басында болған аудан басшысы бас мердігермен кездесті. Қараөзен, Жалпақтал ауылдарында ауыз су жүйесінің құрылыс жұмыстарын «ПМК – 17» ЖШС жүргізуде. Осы мекеменің учаске басшысы Бауыржан Рысқалиевтің айтуынша, құрылыс жұмыстары жақын арада аяқталып, қос ауылдың тұрғындары таза ауыз сумен қамтылатын болады. Бұдан кейін Абат Абайұлы салынып жатырған 12 пәтерлік 2 қабатты тұрғын үйдің басына барды. Іргетасы енді ғана қаланып жатырған бұл үйдің құрылыс жұмыстарын «Эврика» ЖШС жүргізуде. Бұл тұрғын үйдің жобалық құны 112 млн. 166 мың теңгені құраса, қаражат облыстық бюджеттен бөлінуде. Құрылыс нысанын көрген аудан әкімі мердігерге құрылыс жұмыстарын сапалы атқаруды тапсырды. Сонымен қатар аудан әкімі Жаңажол ауылындағы жол құрылысына да соқты. Мақаламыздың басында айтылғандай Жаңажол ауылының кіреберісі мен Жалпақтал бағытындағы шығаберісіне және ауыл ішіндегі 3 көшеге жалпы ұзындығы 7,5 шақырымды құрайтын қатқыл табанды жол төселуде. Бұдан басқа 4 көшеге жаяу жүргінші жолдары жасалуда. Бұл жұмыстарды «Айдана» ЖШС атқаруда. Құрылыс жұмыстарымен танысқан аудан әкімі мердігер жұмысына оң бағасын берді.

Қайрат ЖАҚЫП


«АДАЛ ЖОЛ – ЧЕСТНЫЙ ПУТЬ» МАРАФОН АУЫЛДЫҚ ОКРУГТЕРДЕ ЖАЛҒАСУДА

Күні: , 2 рет оқылды

Өткен аптада ауданымызда басталған «Адал жол –честный путь» жобасы аясында сыбайлас жемқорлыққа қарсы марафон ауылдық округтерде жалғасын табуда. Марафон шағын футболдан жолдастық кездесу түрінде өтуде. Осыған орай 14 шілде күні Қошанкөл ауылдық округі 3 командадан жолдастық кездесу ұйымдастырып, эстафетаны Тереңкөл ауылдық округіне табыстады. Жолдастық кездесу тартысты әрі қызықты өтті. Естеріңізге салайық, өткен аптада «Адал жол – Честный путь» жобасы аясында аудан орталығындағы мекемелер өз арасында сыбайлас жемқорлыққа қарсы эстафетаны өткізген болатын.

Гүлнұр ҚАЗБЕК


«АШЫҚ ӘКІМДІК» ӨТТІ

Күні: , 2 рет оқылды

16 шілде күні аудандық мәдениет үйінде аудан әкімінің және салалық мекеме басшыларының «АШЫҚ ӘКІМДІК» атты ашық есік күндері аясында аудан тұрғындарын жеке мәселелері бойынша қабылдауы өтті. Қабылдауда тұрғындар зиратты қоршау, ауыз судың берілуі мен М.Әуезов көшесіне техникалық су өткізу жөнінде , сонымен қатар тұрғын үй мәселі мен жұмыс жәйінда өздерін толғандырып жүрген сұрақтарын қойды. Аталмыш сұрақтарға аудан әкімі мен салалық мекеме басшылары тиісті жауаптар қайтарып, айтылған мәселелер назарда болатынын айтты. 17 шілде күні «ашық әкімдік» қабылдау күні Жалпақтал ауылында өтті. «Ашық әкімдікке» аудан әкімі Абат Шыныбеков, аудан прокуроры Нұрлыбек Мұсағалиев және салалық мекеме басшылары қатысып, ауыл тұрғындарын қабылдады. «Ашық әкімдікке» келген тұрғындар негізінен ауызсу, тұрғын үй және жұмысқа орналасу сияқты мәселелерін ортаға салып, тиісті жауаптарын алды. Сонымен қатар аудан әкімі Абат Шыныбеков пен аудан прокуроры Нұрлыбек Мұсағалиев тұрғындарды жекелей сұрақтарымен де қабылдап, олардың ұсыныс-пікірлерін де тыңдады. Жалпақтал ауылында өткен «ашық әкімдікке» 30 шақты ауыл тұрғыны қатысып, өздерін мазалап жүрген мәселелерін ортаға салды.

Гүлнұр ҚАЗБЕК


БОЛАШАҚТЫҚТАР ӘДЕМІ КЕШ СЫЙЛАДЫ

Күні: , 2 рет оқылды

14 шілде күні «Достық» саябағында Астананың 20 жылдығына және ауданымыздың 90 жылдығына арналған Болашақ ауылдық округінің «Туған жерім, тұнған тарих!» атты өнер фестивалі өтті. Бұл фестивальге болашақтық өнерпаздар жоғары деңгейде дайындалғанын айта кету керек. Ақшаңқай киіз үйдің ішінде үлкендерге ұлттық тағамдардан дәм татқызса, қолөнер көрмесін де ұйымдастырып, түрлі ұлттық ойындар да өтіп жатты. Шараның ашылу салтанатында сөз алған Болашақ ауылдық округінің әкімі Қобылан Дүйсенов округ тұрғындарының ыстық ықыласын жеткізсе, Қазталов ауылдық округінің әкімі Жүсіп Шакуов әрдайым да ауданымыздың дамуы жолында аянбай еңбек етіп жүрген округ ұыжымына алғысхат табыстады.. Концерттік бағдарламада «Әжелер» ансамблі әсем әннен шашу шашып, бишілер мың бұрала би билеп, өз өнерлерін ортаға салды. Сондай-ақ поэзия топтамасына кезек беріліп, аудан орталығының аспаны жырға бөленсе, КТА ойыншылары да әзілдерін көрерменге ұсынды. Бұнымен қатар ұлттық көріністер көрсетіліп, ұмыт қалып бара жатырған ұлттық дәстүрлер жаңғыртылды. Шалғай ауылдан келіп, өнерлерін ортаға салған болашақтықтарға тұрғындар ризашылықтарын білдіріп жатты.

Жұлдыз АСҚАР


АШЫҚ ЕСІК» КҮНДЕРІ АЯСЫНДАҒЫ ТҰРҒЫНДАРМЕН КЕЗДЕСУ

Күні: , 2 рет оқылды

14 шілде күні аудан әкімдігінің «Ашық есік» күндері аясында аудан әкімі Абат Шыныбеков Ордабай, Қошанкөл, Беспішен, Мереке және Нұрсай ауылдарының тұрғындарымен кездесті. Тұрғындармен өткен жиында Қошанкөл және Тереңкөл ауылдық округтерінің әкімі Радж Шарипов пен Ернар Ғалимов округтерде жыл басынан бері атқарылған жұмыстардан қысқаша xабарлама жасады. Жиында аудан әкімі Абат Абайұлы ауданда жасалып жатырған істер туралы баяндап, алда тұрған жоспарлармен бөлісті. Сонымен қатар бірқатар мекеме басшылары ауыл шаруашылық, жұмыспен қамту, ветеринария саласы бойынша бағдарламалармен таныстырып, өзгерістерді айтып өтті. Ауыл тұрғындары да өздерінің көкейлерінде жүрген сұрақтарын қойып ұсыныстарын жеткізді. Мәселен, Ордабай ауылының xалқы ауызсу, құдық қазу, малға жем-шөп дайындау, сонымен қатар ауыл тазалығы мәселелерін көтерсе, қошанкөлдіктер ветеринария саласы бойынша өз сауалдарын қойып, мал жайылымы туралы тілге тиек етті. Ал Мереке ауылының тұрғындары аудан әкімі шабандық жердің мәселесі мен «Тереңкөл-Мереке» бағытындағы жолдың тегістелуін назарда ұстаса деген ұсыныстарын жеткізді. Кездесулер барысында аудан әкімі округтердегі әлеуметтік нысандарды аралап, Қошанкөлдегі ауыз су құдығының тазалау жұмысымен танысып өтті.

Гүлнұр ҚАЗБЕК


ОРАЛДЫҚ ОҚЫРМАНДАР РАХМЕТ АЙТАДЫ

Күні: , 4 рет оқылды

Шындығы керек, мерзімді баспасөзге жазылудың екінші жарты жылдығында қиындықтар кездесіп қалып жатады. Оның да өзіндік себептері бар. Түрлі науқандық жұмыстар, адамдардың демалысқа кетуі және тағы басқа да жағдайлар… Дегенмен баспасөз әрбір шаңыраққа жетуі тиіс. Бұл орайда «Егемен Қазақстан» , «Орал өңірі», «Приуралье» және «Ауыл айнасы» газеттері ел жаңалығын жеткізетін бірден-бір басылымдар. Осы басылымдардың ауданда таралымы өсуі жолында аудандық ішкі саясат бөлімі көп жұмыстар атқаруда. Аудан әкімі Абат Абайұлы «Ауыл айнасы» газетін қазіргі күнде Орал қаласында тұратын жерлестеріміздің де алдырып оқуына мүмкіндік болу үшін аудан кәсіпкерлерінің қолдауын сұраған еді. Нәтижесінде кәсіпкерлер Райхан Қажымова, Гүлнәр Тайгаренова, Дәрмен Қадеров, Жасұлан Байғонақов, Айнагүл Қабдоловалар Орал қаласындағы 20 жерлесімізді «Ауыл айнасы» газетіне жаздыртты. Олардың ішінде бұрын ауданымыздың дамуына үлес қосқан азаматтар бар. Сондықтан осындай қолдау көрсеткендері үшін Абат Абайұлына және кәсіпкерлерге оралдық жерлестеріміз атынан рахмет айтып, жұмыстарына табыстар тілейміз!

Қайрат ЖАҚЫП


КОМИССИЯ ОТЫРЫСЫ ӨТТІ

Күні: , 4 рет оқылды

12 шілде күні сыбайлас жемқорлық қарсы күрес мәселелері жөніндегі аудандық комиссия отырысы өтті. Аудан әкімі Абат Шыныбековтың төрағалық етуімен өткен комиссия отырысына комиссия мүшелері, бөлім басшылары, округ әкімдері, қоғамдық ұйым өкілдері қатысып, күн тәртібіндегі денсаулық сақтау жүйесінде сыбайлас жемқорлықтын алдын алу және болдырмау жөніндегі жүргізілген жұмыстары мен Қазақстан Республикасының 2015-2025 жылдарға арналған сыбайлас жемқорлыққа қарсы стратегиясын іске асыру жөніндегі іс-әрекеттердің орындалуы туралы мәселелерін талқылады. Сонымен қатар аудан әкімінің төрағалық етуімен құқық бұзушылық профилактикасы жөніндегі ведомствоаралық комиссия отырысы өтті. Күн тәртібінде уәкілетті және құқық қорғау органдарының бас бостандығынан айыру орындарынан босатылған тұлғаларды бейімдеу және оңалту жөніндегі қабылданған шаралар және құқық қорғау және атқарушы органдардың бөтеннің мүлкін ұрлау қылмысының алдын алу, оған қарсы күрес бойынша жүзеге асырылған шаралар туралы мәселелерді қарады. Сондай-ақ комиссия отырысы барысында құқық бұзушылықтар, құқық бұзушылықты хабарлау және қоғамдағы қылмыстардың алдын алу саласындағы өзекті мәселеле р кеңінен талқыланды. Округ аумағындағы мәселелерді шешу барысында құқық бұзушылықтарға мүлдем төзбеушілік қағидасы мен тұрғындардың жауапкершілігі маңызды рөл атқаратындығы атап өтілді. Барлығымыздың отбасында, көшеде, ұжымда құқықтық тәртіпті сақтауымыз қоғамда заңдылықтың сақталуына оң өзгеріс әкеліп, оның ішінде біздің округте тұтастай алғанда қазақ елінің дамуына қажетті жағдайлар туғызатындығы сөзсіз.

Гүлнұр ҚАЗБЕК


ХАБАРЛАНДЫРУ

Күні: , 8 рет оқылды

Қазақстан Республикасының Қоғамдық даму министрлігі 2018 жылғы  1 шілдеден бастап ҮЕҰ-ға арналған сыйлықақыны беру үшін өтінімдерді қабылдайды. Қоғамдық даму министрлігі үкіметтік емес ұйымдарға арналған сыйлықақыны беруге келесі бағыттар бойынша конкурс өткізу туралы хабарлайды: 1) білім беру, ғылым, ақпарат, дене шынықтыру және спорт саласындағы мақсаттарға қол жеткізу; 2) азаматтардың денсаулығын сақтау, салауатты өмір салтын насихаттау; 3) қоршаған ортаны қорғау; 4) жастар саясаты мен балалар бастамаларын қолдау; 5) отбасылық-демографиялық және гендерлік мәселелерді шешуге жәрдемдесу; 6) халықтың әлеуметтік тұрғыдан осал топтарын қолдау; 7) жетім балаларға, толық емес және көп балалы отбасылардағы балаларға көмек көрсету; 8) халықты еңбекпен қамтуға жәрдемдесу; 9) азаматтар мен ұйымдардың құқықтарын, заңды мүдделерін қорғау; 10) мәдениет пен өнерді дамыту; 11) тарихи-мәдени мұраны қорғау; 12) қоғамдық келісімді және ұлттық бірлікті нығайту; 13) өздерінің есебінде тұрған адамдарға әлеуметтік-құқықтық көмек көрсету кезінде пробация қызметтеріне жәрдемдесу; 14) мемлекеттік қызметтер көрсету сапасына қоғамдық мониторинг жүргізу; 15) азаматтық қоғамды дамытуға, оның ішінде үкіметтік емес ұйымдар қызметінің тиімділігін арттыруға жәрдемдесу. Байқауға Қазақстан Республикасында тіркелген және Үкіметтік емес ұйымдардың дерекқорына мәліметтер ұсынған үкіметтік емес ұйымдар қатыса алады. Бір үкіметтік емес ұйым бір номинациядан артық сыйлықақыны алуға  ұсыныла алмайды. Сыйлықақы алғаннан кейін үш жыл ішінде оны алу үшін қайта ұсынуға жол берілмейді. Бір номинация бойынша сыйлықақы бір немесе бір мезгілде бірнеше үміткерге берілуі мүмкін. Бұл жағдайда сыйлықақы олардың арасында тең бөлінеді. Сыйлықақыны алу үшін өтінімді ұсынуға арналған тізбе мыналарды қамтиды: 1)   өтініш (осы Қағидаларға 1-қосымшаға сәйкес  нысан бойынша бірінші басшы немесе оның міндетін атқаратын адам қол қойған үкіметтік емес ұйымның ресми бланкісінде); 2)   осы Қағидаларға 2-қосымшаға сәйкес сыйлықақыға үміткердің сауалнамасы; 3)   осы Қағидаларға 3-қосымшаға сәйкес сыйлықақыға үміткердің қызметі туралы сипаттама (растайтын материалдармен бірге); 4)   соңғы 3 (үш) жыл ішінде ұсынылған бағыт бойынша іске асырылған жобаларды және бірлескен жұмыс барысында қол жеткізілген нәтижелерді растау мақсатында байланыс деректері көрсетілген қоғамдастық (үкіметтік емес ұйымдар) және (немесе) мемлекеттік органдар өкілдерінің ұсынымдары (екіден кем емес); 5)   үкіметтік емес ұйымдарды мемлекеттік тіркеу (қайта тіркеу) туралы құрылтай құжаттарының және куәлiгiнің (анықтаманың) көшірмелері; 6)   банк шотының болуы туралы анықтама (түпнұсқа). Сыйлықақыны алу үшін үкіметтік емес ұйымдарды ұсыну жөніндегі өтінімдер Қазақстан Республикасының Қоғамдық даму министрлігінің Азаматтық қоғам комитетіне қағаз және электронды жеткізгіштерде (СD-дискілерде не USB-флеш-жинақтағыштарында DOC, DOCX, Pdf форматында) 2018 жылғы 1 шілдеден бастап 1 қыркүйек аралығында келесі мекенжай бойынша қабылданады: Астана қаласы, Мәңгілік Ел даңғылы 8, «Министрліктер үйі» ғимаратының 15-кіреберісіндегі 265-кабинет. Анықтама телефондары: +7 (7172) 74 05 11, 74 09 97. Естеріңізге саламыз, ағымдағы жылғы 13 маусымда Мемлекет Басшысымен «Қазақстан Республикасының кейбір заңнамалық актілеріне коммерциялық емес ұйымдардың қызметі мәселелері бойынша өзгерістер мен толықтырулар енгізу туралы» Заңына қол қойылды. Заңның қабылдануымен сыйлықақы алуға ұсынуға үкіметтік емес ұйымдардың мүмкіндігі кеңейді. Бұрын сыйлықақы алуға ұсынғаннан кейін үш жыл ішінде конкурсқа қатысуға шектеу болатын. Заң қабылданғаннан кейін өткен жылы сыйлықақы алуға ұсынылған, бірақ жеңімпаз болып табылмаған үкіметтік емес ұйымдар, келесі жылдары да сыйлықақы алуға ұсынуға мүмкіндік алады.  Қағидаға келесі сілтеме бойынша орналасқан https://diakom.gov.kz/kk/content/buyryktar

АҚЖАЙЫҚТАҒЫ АУМАҚТЫҚ СЕМИНАР

Күні: , 16 рет оқылды

Бүгін Ақжайық ауданында БҚО Қазақстан Халқы Ассамблеясының аумақтық семинары өтті. Семинарға Ақжайық, Қазталов ауданы әкімдерінің орынбасары, ішкі саясат бөлімдері, қоғамдық келісім кеңестерінің төрағалары, этномәдени бірлестіктер құрамы, медиаторлар, ақсақалдар, аналар, жастар кеңестері қатысты. Семинарда Ақжайық ауданының әкімі Әділ Жоламанов ауданда қоғамдық келісім кеңестері бойынша атқарылып жатырған жұмыстарға тоқталды. Осы орайда БҚО Қазақстан Халқы Ассамблеясының төрағасының орынбасары Ғайса Қапақов, — Қоғамдық келісім кеңестерін жаңа белестерге көтеріп, жұмыстарын әрі қарай дамытуымыз қажет. Сол себептен де бүгінгі семинарды да практикалық тәжірибе алмасу бағытында өткізіп отырмыз. Облыстық қоғамдық келісім кеңесінің құрамында 54 адам бар. Бұл кеңестің құрамында бар адамдар ауылдағы саяси-ахуалға талдау жасап, қандай да болмасын мәселелердің оң шешімін тауып отыруы қажет. Яғни, елдің бірлігін ұйымдастырып, қадағалап отыратын идеялогиялық жұмыс болып табылады, — деді. Сонымен қатар семинарда БҚО әкімі аппараты «Қоғамдық келісім» КММ басшысының орынбасары Жамал Ихсанова қоғамдық келісім кеңесінің жұмысы туралы баяндаса, БҚО әкімі аппаратының «Қоғамдық келісім» КММ-нің медиаторы Алуа Ғилыманқызы медиация жөнінде, ал облысымыздағы ғылыми-сараптамалық топтың жұмысы туралы Асия Төлеубайқызы айтып өтті. Семинарда Қазақстан халқы ассамблеясының «Жаңғыру жолы» жастар қозғалысының бастау алғаны туралы да айтылып, жастарды жаңа қырынан танытуға және жаңа жобалар ұсынуға шақырды. Семинарда Жалпақтал ауылдық округінің қоғамдық медиаторы Жамбыл Нұғманов қоғамдық кеңестің жұмысын жандандырып, халыққа тиімді болуы үшін тек газет бетінде ғана емес, теледидардан тікелей эфирде ашық пікір алаңы ұйымдастырылса екен деген ұсынысын білдірді. Семинарға қатысушылар сұрақтар қойып, ой-пікірлерін ортаға салды.

Жұлдыз АСҚАР


Қазталов ауданы, Шарафутдинов көшесі 13
zhaik_presscenter@mail.ru
aulainasi@mail.ru

"Ауыл айнасы"

"Ауыл айнасы" газетінің бас редакторы: 8-71144-31-4-68
Тілшілер: 31-4-68, 21-3-70
Жарнама бөлімі: 21-0-42

 

.