АЙМАҚ

СПОРТ

ҚОҒАМ

Құттықтаулар


ТӨРТІНШІ ДЕҢГЕЙДЕГІ БЮДЖЕТТІҢ ҚАРЖЫСЫ КӨБЕЙДІ

Күні: , 20 рет оқылды

25 шілде күні аудандық мәслихаттың кезектен тыс 24 сессиясы өтті. Сессияның күн тәртібінде Қазталов аудандық мәслихатының 2017 жылғы 27 желтоқсандағы №18-1 «2018-2020 жылдарға арналған ауылдық округтердің бюджеттері туралы» шешіміне өзгерістер мен толықтыру енгізу туралы мәселе қаралып, аудандық экономика және қаржы бөлімінің басшысы Қадер Нұрғалиев хабарлама жасады. Хабарламаға қысқаша тоқталсақ, дербес бюджеті бар округтерге аудандық бюджеттен берілетін трансферттер көлемі 8 млн. 604 мың теңгеге көбейіп отыр. Соның ішінде Қазталов ауылдық округіне — 5 млн. 310 мың, Жалпақтал ауылдық округіне — 5 млн. 302 мың және Бостандық ауылдық округіне — 322 мың теңге қаражат бөлінбек. Сессияда күн тәртібіндегі мәселе бойынша аудандық мәслихаттың депутаттары бірауыздан қабылдады. Сессия соңында сөз алған аудан әкімі Абат Шыныбеков округ әкімдеріне және мамандарына табыс салығынан түсетін кірістерді көбейтіп, округтерде жоспарланған істерді нақтылауға және бюджеттік комиссияға уақытылы ұсынуға тапсырма берді.

Қайрат ЖАҚЫП


СЕНАТ ДЕПУТАТТАРЫ АУДАНЫМЫЗДА

Күні: , 24 рет оқылды

23 шілде күні ауданымызға Қазақстан Республикасы Парламент Сенатының депутаттары Нариман Төреғалиев пен Ерболат Мұқаев жұмыс сапарымен келді. Халық қалаулылары өз жұмыстарын Жалпақтал аулында былтырғы жылы күрделі жөндеуден өткен № 15 өрт сөндіру бөлімінің жұмысымен танысудан бастады. Бұдан кейін депутаттар Жалпақтал аулының Байқоңыр көшесіндегі салынып жатырған 12 пәтерлік 2 қабатты үйге соғып, құрылыс жұмыстарын өз көздерімен көрді. Сонымен қатар Елбасымыздың «Рухани жаңғыру» бағдарламасы аясында жасалған саябақтағы «батырлар аллеясы» мен қылқалам шебері Сәкен Ғұмаровтың ескерткішіне келген депутаттар туған ауылдың перзенттері ауылдарына жасаған жақсылықтарына оң бағаларын берді. Жалпақтал аулындағы атқарылған істерді аралап шыққан Нариман Төреғалиев пен Ерболат Мұқаев Жалпақтал мәдениет үйінің фоесінде қоғамдық ұйым өкілдері, ауыл ақсақалдары және мекеме басшыларымен кездесті. Кездесуде халық қалаулылары Қазақстан Республикасында қабылданып жатырған жаңа заңдар мен өзгерістер туралы мағлұмат бере келе, халықтың ұсыныс-пікірлерін тыңдап, сұрақтарына жауап берді. Ат басын аудан орталығы Қазталов бағытына бұрған Сенат депутаттары жолдан Жаңажол ауылына соғып, күрделі жөндеуден өтіп жатырған кіре беріс және ауыл ішілік жолдардың құрылысымен танысты. Аудан орталығына келген Сенат депутаттары былтырғы жылы пайдалануға берілген 100 орындық интернатқа соғып, құрылыс жұмыстарының сапалы атқарылғанына куә болды. Сондай-ақ осы интернаттың қасында салынып жатырған саз мектебіне барған депутаттар құрылыс жұмысын атқарып жатырған «ЖолаушыЖол» мекемесінің уәкілдерімен кездесті. Аудандық тарихи-өлкетану музейіне келген халық қалаулыларына қойылған экпонаттар туралы музей жетекшісі Назкеш Адаялиева қызықты әңгімелеп берді. Сенат депутаттары жұмыс сапарларын «Нұр Отан» партиясының мәжіліс залында қортындылап, аудан активімен кездесті.

Қайрат ЖАҚЫП


КӘСІП ИЕЛЕРІМЕН КЕЗДЕСТІ

Күні: , 20 рет оқылды

20 шілде күні Қазталов ауданы әкімінің орынбасары Нұретден Құтхожиннің төрағалық етуімен «Еңбек» нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған бағдарламасы аясында ауыл шаруашылығы саласындағы несиелендіру мәселелерін түсіндіру, талқылау жұмыстарын жүргізу аясында аудан шаруа қожалықтарының жетекшілерімен, кәсіпкерлермен кездесу өткізді. Кездесуге «Аграрлық несие корпорациясы» АҚ БҚО филилалының маманы Әдиет Орашев, «Ауыл шаруашылығын қаржылай қолдау қоры» АҚ БҚО филиалының маманы Талап Бисенбаев қатысып, ауыл шаруашылығы саласындағы несиелендіру мәселелерін түсіндіру, талқылау жұмыстарын жүргізді. Кездесуге қатысқан Батыс Қазақстан облысының ауыл шаруашылығы басқармасының бас маманы СерікболАяпов, -Жұмыспен қамту және еңбекақы төлеу, адами капитал сапасын арттыру саясатын жаңғырту, кәсіпкерлікті жан-жақты қолдау, әлеуметтік қолдаудың атаулылығын қамтамасыз ету «Қазақстан – 2050» Стратегиясына және Қазақстанның әлемнің ең дамыған 30 мемлекетінің қатарына кіруі жөніндегі тұжырымдамаға сәйкес даму басымдықтары ретінде айқындалған. Осыған байланысты «Нәтижелі жұмыспен қамтуды және жаппай кәсіпкерлікті дамыту» бағдарламасы еңбек нарығында сұранысқа ие кәсіптік біліктілікті және дағдыларды меңгерудің тиімді жүйесін, халықтың әлеуметтік тұрғыдан осал топтарын қолдауды қоса алғанда, еңбек делдалдығының тиімді моделін құруға бағытталған, -деді өз сөзінде. Кездесуге қатысқан шаруа қожалықтары жетекшілері мен кәсіпкерлер сұрақтар қойып, ұсыныс-пікірлерін білдірді.

Гүлнұр ҚАЗБЕК


ҚҰРЫЛЫС НЫСАНДАРЫН АРАЛАДЫ

Күні: , 24 рет оқылды

Ауданымыз бойынша былтырғы жылды есепке алмағанда биылғы жылдың өзінде құрылыс жұмыстары қарқынды жүруде. Мемлекеттік «Ақбұлақ» бағдарламасы бойынша елді мекендерге ауыз су жүйелері іске қосылып жатырса, аудан орталығы Қазталов ауылында саз мектебінің құрылысы, Жалпақтал ауылында 12 пәтерлі тұрғын үйдің құрылыс жұмыстары, Көктерек, Талдыапан, Талдықұдық бағыттары бойынша көгілдір отын тарту жұмыстары атқарылуда. Ал қатқыл табанды жол төсеу жұмыстарына келсек, облыс орталығынан тартылып келе жатырған жолдың құрылысы биыл жалғасын тауып жатыр. Жалпақталдан асқан жол құрылысы да жанданып, Қазталов бағытында 35 шақырым қашықтық жасалып жатыр. Сонымен қатар Жаңажол ауылының кіреберіс, шығаберіс және ауылішілік жолдарына қатқыл табанды жол төселіп, жаяу жүргіншілер жолы да істелуде. Ал Қазталов және Жалпақтал ауылдарына ауылішілік жолдар салынады деп күтілуде. Осыған орай 17 шілде күні аудан әкімі Абат Шыныбеков Жалпақтал, Жаңажол ауылдарында болып, құрылыс нысандарын аралады. Жалпақтал ауылындағы «Ақбұлақ» бағдарламасы аясында тартылып жатырған ауыз су жүйесінің басында болған аудан басшысы бас мердігермен кездесті. Қараөзен, Жалпақтал ауылдарында ауыз су жүйесінің құрылыс жұмыстарын «ПМК – 17» ЖШС жүргізуде. Осы мекеменің учаске басшысы Бауыржан Рысқалиевтің айтуынша, құрылыс жұмыстары жақын арада аяқталып, қос ауылдың тұрғындары таза ауыз сумен қамтылатын болады. Бұдан кейін Абат Абайұлы салынып жатырған 12 пәтерлік 2 қабатты тұрғын үйдің басына барды. Іргетасы енді ғана қаланып жатырған бұл үйдің құрылыс жұмыстарын «Эврика» ЖШС жүргізуде. Бұл тұрғын үйдің жобалық құны 112 млн. 166 мың теңгені құраса, қаражат облыстық бюджеттен бөлінуде. Құрылыс нысанын көрген аудан әкімі мердігерге құрылыс жұмыстарын сапалы атқаруды тапсырды. Сонымен қатар аудан әкімі Жаңажол ауылындағы жол құрылысына да соқты. Мақаламыздың басында айтылғандай Жаңажол ауылының кіреберісі мен Жалпақтал бағытындағы шығаберісіне және ауыл ішіндегі 3 көшеге жалпы ұзындығы 7,5 шақырымды құрайтын қатқыл табанды жол төселуде. Бұдан басқа 4 көшеге жаяу жүргінші жолдары жасалуда. Бұл жұмыстарды «Айдана» ЖШС атқаруда. Құрылыс жұмыстарымен танысқан аудан әкімі мердігер жұмысына оң бағасын берді.

Қайрат ЖАҚЫП


ЖОЛАУШЫЛАР ДƏМ ТАТСА, ШАРШАМАЙ ЖЕТЕРІ СӨЗСІЗ

Күні: , 28 рет оқылды

Аудан орталығындағы кәсіпкер Мәншүк Малаеваның халыққа қызмет жасайтын дүкендерін жұртшылық жақсы біледі. Əсіресе, оның дүкені жыл бойына тұрғындарды ет өнімдерімен қамтамасыз етуде үзіліс болып көрген жоқ. Сондықтан да тұтынушылар Мәншүкке риза. Дүкенде ет өнімдерінен дайындалған қуырдақ, қазы, кептірілген құйрық майлары тағы басқа да өнімдер жеткілікті. Мəншүктің Шайханасы да адамдарға сапалы қызмет жасауда. Қазіргі жаздың аптап ыстығында сусынның барлық түрі тұр. Сонымен қатар ыссы, қою шай мен жаңадан пісірілген бауырсақ та жолаушыларға дəмді мəзір болуда. Мəншүк: — Енді жолаушыларға салқын көже(қамыран) əзірлеуді қолға алайын деп отырмын. Себебі ұлтымыздың сүттен жасалған көжесі адам денсаулығына пайдалы əрі таптырмас сусын,-дейді. Міне, жаз айында жолаушылап келген жолаушылар осындай салқын шайханадан дəм татса, баратын жерлеріне шаршамай жетері сөзсіз.

Серік ЖҰМАҒАЛИЕВ


ҚОС АУЫЛДА АУЫЗ СУ ЖҮЙЕЛЕРІ ІСКЕ ҚОСЫЛДЫ

Күні: , 26 рет оқылды

Жұртшылық үшін аса маңызды болып отырған ауызсу мәселесі Қазталов ауданында жыл өткен сайын оңтайлы шешімін тауып келеді. Күрмеуі қиын мәселе мемлекеттік «Ақбұлақ» бағдарламасы аясында жүзеге асып жатыр. Сөз еткелі отырған оқиға «Ақ бұлақ» бағдарламасы бойынша Елордамыз – Астана қаласының 20 жылдығына орай 4 шілде күні Қайыңды, Ақпәтер ауылдарында таза ауызсу жүйесін қайта жабдықтау жұмыстары аяқталып, іске қосылды. Нысандардың ашылу салтанатына арнайы қатысқан облыс әкімінің орынбасары Бибігүл Қонысбаева Қайыңды, Ақпәтер ауылдарының тұрғындарын құттықтап, — Елбасымыздың сарабдал саясатының арқасында ауылдарды таза ауызсумен қамту жұмыстары жүзеге асуда. Елімізде «Ақ бұлақ» бағдарламасы бекітілді. Бағдарламаның басты мақсаты биік. Халықты қажетті мөлшердегі және сапалы ауыз сумен қамтамасыз ету. Осы орайда облысымыз бойынша былтырғы жылдан бері жобалық құны 4 млрд теңге құрайтын таза ауызсу құрлығыларының құрылыс жұмыстары іске асуда. Сол қатардағы жұмыстар Қазталов ауданының 13 елді мекенінде атқарылуда. Өздеріңіз куә болып отырғандай таза ауызсу жүйелерін Қайыңды мен Ақпәтер ауылдарында қосып отырмыз. Денсаулықтың кепілі болатын ауызсуларыңыз сарқылмасын,- деген тілегін білдірді. Сондай-ақ нысандардың ашылу салтанатында аудан әкімі Абат Шыныбеков құрылыс жұмыстарын жүргізген «НовоселСтройСервис» және «БатысГазСтой» ЖШС-нің басшыларына ауыл тұрғындары атынан ризашылығын білдіріп, алғыс хаттар табыстады. Қос нысанның ашылу салтанатынан кейін облыс әкімінің орынбасары Бибігүл Тищанқызы таза ауыз су қондырғыларының жұмыстарымен танысып, ауыл ақсақалдарымен кездесті. Сондай-ақ Бибігүл Тищанқызы ауызсу өткен үйлерге де кіріп шықты. Ауыз судың шапағатын көріп отырған жанның бірі – Сақыпжамал Жұмалиева. Зейнеткер апамыз Ақпәтер ауылында ұзақ жылдар ұстаздық қызмет атқарыпты. – Елімізде сапалы ауыз суға жарымай отырған елді-мекендер көп-ақ. Өзіміздің басымыздан өтті ғой. Бұл мемлекеттік бағдарламаның арқасы. Осының аясында да көптеген елді-мекендерге, әсіресе шалғайдағы ауылдарға да су тартылып, халық сапалы ауыз судың игілігін көре бастады. Бізде үйімізге су кіріп рахатын көріп жатырмыз. Су тіршілік көзі ғой. Осындай игі істер су зардабын көріп отырған әр ауылда атқарылып жатыр. Осы жұмыстарды атқарған барлық азаматтарға алғысым шексіз, – дейді Сақыпжамал апа. Айта кететіні, Қайыңды ауылындағы таза ауызсу жүйесін қайта жабдықтау жұмысына 196 млн теңге қаражат жұмсалса, Ақпәтер ауылындағы нысанның қайта құру жұмысына 247 млн теңге республикалық бюджеттен бөлінген болатын. Құрылыс нысандары толығымен сапалы аяқталып, екі ауылдың тұрғындары таза ауызсумен қамтылуда. Жоғарыда аталған қос ауылға да Қараөзен өзені арқылы тазарту құрлығылары қойылып, ауызсу жүйесі тартылып отыр. Ел ырыздығын арттырып, көптің алғысын арқалаған «Ақ бұлақ» бағдарламасы аясында атқарылып жатқан бұл бір аудандағы іс. Осы сияқты облыс бойынша қаншама ауылға ауызсу жетіп жатыр. Келешекте су машақатын көріп отырған тұрғындардың жанайқайы да осылайша оң шешімін тауып жатса игі.

Қайрат ЖАҚЫП


АУДАНДА КӨГІЛДІР ОТЫН ТАРТУ ЖҰМЫСТАРЫ БАСТАЛДЫ

Күні: , 26 рет оқылды

Ауданымыздың 41 пайызы табиғи газбен қамтылып отыр. Кейбір ауылдық округтер бізге «көгілдір отын қашан келеді» екен деген көкейдегі сұрақтарын әкімдердің есеп беру жиындарында талай айтып жүр. Сол көгілдір отынның жыры биыл өз шешімін тапты. Ауданымыздағы 13 елді мекенге көгілдір отын тарту жұмыстары басталды. Бұл жұмыстарды «АлияСервис» ЖШС-гі атқаруда. Серік, Сарықұдық, Қайшақұдық, Талдыапан және Қособа ауылдарын, Көмекші, Көктерек, Оразғали, Жұлдыз ауылдарын газбен жабдықтау және Кішкенешал, Талдықұдық, Кішіталдықұдық, Бейістерек елді мекендерін көгілдір отынмен қамту проблемалық мәселесі шешіліп, үш бағытқа республикалық және облыстық бюджеттерден қаржы бөлінуде. Міне, «көптен күткен ұлы той» — демекші газ мәселесі алыстағы ағайынның көптен бері қол жеткізе алмай жүрген арманы десек артық айтқандық болмас. Армандаған көгілдір отынның ауылы да алыс емес

Тұрарбек АҚМУРЗИН


«ИБАТШЕГЕНДЕГІ» ИБАТОВТЫҢ ТАБЫСЫ

Күні: , 156 рет оқылды

Жарықтық, Сарыөзеннің бойы мал бағуға қолайлы жер ғой. Осы жерде «Ибатшеген» деген мал қыстағы бар. Сол орынға Есенгелді Ибатов деген азамат » Наурыз-97″ шаруа қожалығын құрып, шаруасын дөңгелетуде. 20 жылдың ішінде адал еңбегінің нәтижесін көріп отыр. Ол мал өсірудің, оның табыс көзіне жетудің бірден-бір көзі- мал тұқымын асылдандыру. Қожалықтағы 256 бас ірі қараның 90 бас аналығынан 90 бұзау алса, қой-ешкі 700-ге, жылқы 300 басқа жетіп отыр. Есенгелді ағамыз биылғы жылы «Ангар» деп аталатын мал қорасын және арнайы малға ветеринарлық сауықтыру жұмыстарын жүргізетін орын да салып алды. Сарыөзен бойын малға толтырып жатқан Есенгелді ағаның толағай табыстары әлі алда деп білеміз. (Фотода ұлы Медет)

Гауhар ӘДІЛЖАН


7 ШАРУА ҚОЖАЛЫҒЫ СКВАЖИНАНЫҢ РАХАТЫН КӨРУДЕ

Күні: , 166 рет оқылды

Қазiргi таңда елімізде ауыл шаруашылығына тиесiлi жер ресурстарының 70 пайызы мал бағатын жердiң үлесiне тиесілі екен. Яғни, бiр малдың басына шаққанда 20 гектар жер көлемi бар деген сөз. Бұл дегенiмiз — болашақта индустриялды-инновациялық дамыған, алдыңғы қатардағы аграрлық мемлекет болуға бiздiң толық мүмкiндiгiмiзді көрсетеді. Осындайда жайылымдарды суландыру мақсатында жер асты суларын пайдаланудың неғұрлым сенімді және экономикалық жағынан тиімді әдісі – скважиналар (түтік, труба тәрізді құдықтар) салу. Олардың тиімділігі мынада: кіші диаметрлі және шағын мөлшерде болып, тез салынады. Біздің ауданымыз шөлейтті аймаққа жататыны белгілі. Осы жағдайға байланысты атакәсіппен айналысып отырғандар мал үшін судан зәру көретін еді. Енді соның шешімі табылып жатыр деуге болады. Ол жоғарыда айтқан жер асты суларын скважиналар арқылы пайдалану іске асырыла бастады. Соның бір айғағындай биылғы жылы ЖК «Бурсервис» арқылы шаруа қожалықтары 7 скважина құдық қазып алып, адамға да, малға да қажетті тұщы суға қол жеткізіп отыр. Біз барғанда «Миалы» шаруа қожалығының жетекшісі Өтепберген Бегжанов өзінің қыстағында скважина қаздырып жатыр екен. ЖК «Бурсервистің» жетекшісі Олег Иванов былай деп әңгімелейді: -Осыменен 7 шаруа қожалығына құдық қазып беріп отырмыз. Мына қазылып жатырған құдық 35 метр тереңдіктен асты. Тұщы судың көзіне жету де жақындап қалды. Жалпы біздер жер асты тұщы суының көзіне жету үшін 200 метрге дейін қазу жұмысын жүргізуге мүмкіндігіміз бар, -деді. Бұдан кейін Тереңкөл ауылдық округіне қарасты Базарбек Дүрленовтің және Әбуғали Ғұмаровтың скважиналарын да көзімізбен көруге мүмкіндік туды. Базарбек Дүрленов 60 және 28 метрден шыққан тұщы су көзін пайдаланып отырса, ал Әбуғали Ғұмаров 50 метрден шыққан тұщы су көзін тек малға емес, заманауи салынған үйге де жалғап алыпты. Былайша айтқанда бұл шаруа қожалықтары өздерінің «Ақбұлақ» бағдарламасын «іске асырған». Бізді іссапарға алып шыққан аудандық ауыл шаруашылық бөлімінің басшысы Сергей Тоқпанов, -Ауданымыздың барлық шаруа қожалықтарына үкіметіміз жасап отырған жайылымды суландыру жүйесі бағдарламасын пайдаланып қалуды айтудамыз. Егер шаруа қожалықтары орналасқан жерде тұщы су көздері табылып, осындай скважина орнатып алса өте тиімді болады және осы жұмысты атқаруға кеткен шығынның 80 пайызын өтеуге үкімет субсидия төлейді, -деп әңгіме басын қайырды. Жер астынан арнайы труба арқылы мөлдіреген тұщы суды жылқылар мейірлене ішіп жатқанын және оның үйге кіріп тұрғанын көргенде ауыл шаруашылығы салсында үлкен бетбұрыстың жасалып жатқанына көзіміз жетті.

Серік ЖҰМАҒАЛИЕВ


2017-2019 ЖЫЛДАРҒА АРНАЛҒАН АУДАН БЮДЖЕТІ БЕКІТІЛДІ

Күні: , 148 рет оқылды

15731765_226344194442143_7700427332970924777_o27 желтоқсан күні аудандық мәслихаттың кезектен тыс 8-ші сессиясы өтті. Сессияда ауданның 2017-2019 жылдарға арналған бюджеті бекітілді. Сонымен қатар «Қазталов ауданыныің құрметті азаматы» атағына лайық деген азаматтар да анықталды. Аудандық қаржы және экономика бөлімінің басшысы Жанболат Темірғалиев 2017-2019 жылдарға арналған бюджет туралы қысқаша мағлұмат беріп өтті. -2017 жылға аудан бюджеті 5 миллиард 942 миллион 120 мың теңге болып бекітілді. Оның ішінде өз кірісіміз – 1020 831 мың, субвенция – 3 841784 мың теңге. Республикалық трансферттер – 818 684 мың, облыстық трансференттер – 260 357 мың. 2016 жылдың бекітілген бюджетпен салыстырғанда 28%, ал өз кірісіміз 39,8 % өсіп отыр. Облыстық және республикалық трансферттердің басым бөлігі даму бюджетіне беріліп отыр. Атап айтсақ, Қазталов және Жалпақтал ауылдарын сумен жабдықтауды жалғастыру, Жаңажол, Бостандық, Қайыңды, Ақпәтер, Талдыапан, Сарықұдық, Қайшақұдық және Қособа елді мекендерін сумен қамту жұмыстарын бастауға, -деді Жанболат Серікқалиұлы.

Мөлдір ӘНУАРБЕК


Қазталов ауданы, Шарафутдинов көшесі 13
zhaik_presscenter@mail.ru
aulainasi@mail.ru

"Ауыл айнасы"

"Ауыл айнасы" газетінің бас редакторы: 8-71144-31-4-68
Тілшілер: 31-4-68, 21-3-70
Жарнама бөлімі: 21-0-42

 

.