АЙМАҚ

СПОРТ

ҚОҒАМ

Құттықтаулар


ЖАСТАРМЕН ЖЫЛЫ ЖҮЗДЕСУ

Күні: , 14 рет оқылды

 Жалпақтал ауылдық округінің әкімі Самиғолла Ақмурзин, аудандық ішкі саясат бөлімінің бас маманы Ғалия Ахметова Жалпақтал ауылының белсенді жастарымен жүздесті. Елбасы Нұрсұлтан Назарбаев Қазақстан халқына Жолдауында 2019 жылды «Жастар жылы» деп жариялаған болатын. Осы мақсатта ауыл әкімі Самиғолла Сафиоллаұлы белсенді жастардың пікірлері мен тілектерін тыңдады. -Мемлекетіміз жастарға қашан да ерекше көңіл бөліп келеді. Осының арқасында соңғы жылдары жастардың қоғамдағы рөлі артып, белсенділіктері жоғарылауда. Бүгінгі жастар қоғамда орын алып жатқан әрбір оқиғаға бей-жай қарамай және еліміздің дамуына өз үлестерін қосуы керек, — деді ауыл әкімі. Әр ел келешегінің кемел болуын жастармен байланыстырып, оларды «болашақтың тұтқасы» деп есептейді. Бұл ретте тәуелсіз елімізде өскелең ұрпақ игілігі үшін атқарылған жұмыстар көл-көсір екенін айтпай болмас. Бүгінде жас қазақстандықтар әлемнің кез келген еліндегі қатарласымен терезесі тең. Ел Президентінің салиқалы саясатының арқасында Тәуелсіздігіміздің алғашқы жылдарынан бастап жастар саясаты еліміздің басты басымдылықтардың біріне айналды. Жүздесу барысында аудандық ішкі саясат бөлімінің бас маманы Ғалия Қабдолқызы мемлекет тарапынан жастарға әрдайым қолдаудың жасалып келе жатқанын айтты. Әсіресе, елдің болашағы жастарды жан-жақты демеуде Елбасының өзі үлкен көңіл бөліп отырғанын атап өтті.

Тұрарбек ҚАЙЫРҒАЛИ


КӘСІПКЕР ЕҢБЕК ТӘЖІРИБЕСІМЕН БӨЛІСТІ

Күні: , 14 рет оқылды

4 қараша күні Қазталов ауданының әкімі Абат Шыныбеков бастаған шаруа қожалық жетекшілері облыс жұртшылығына жақсы танымал «Перспектива Кан» ЖШС иелігіндегі тасы өрге домалаған шаруашылықта болып қайтты. Облысымыздағы құрылыс саласындағы алпауаттардың бірі болып саналатын бұл мекеме негізінен көлік инфрақұрылымы мен автомобильдер жолдарын жөндеу жұмыстарымен айналысады. Нұрлан Карин басқаратын кәсіпорын соңғы екі жылдан бері атакәсіп мал өсіруге бет бұрып, жақсы нәтижелі жұмыстар атқаруда. Зеленов ауданына қарасты Январцево ауылдық округінен  жер алып, шаруасын бастап жатырған Нұрланның ісіне бізден бұрын облыс әкімі Алтай Көлгінов куә болып, нәтижелі жұмысқа ризашылығын білдірген болатын. Нұрланның шаруа қожалығында бас қосқан қазталовтық шаруалар 500 бас ірі қараға арнап салынып жатырған мал бордақылау алаңының құрылысымен танысып, нысанның заманауи бағытта салынып, сапалы құрылыс материалдары жұмсалып жатырғанын өз көздерімен көрді. Сонымен қатар бордақылау алаңының қасынан жұмысшыларға арналған үй де салынуда. Жаңа мал бордақылау алаңынан 2-3 шақырым жол жүргеннен кейін, шаруашылықтың негізгі орын тепкен қонысына ат басын тірейсіз. Алдыңыздан табиғат сұлулығы мен адам еңбегінің үйлесім тапқан әдемі көрінісі шығады. Жері құмайт, тал мен тергі мол, аңғарлы өзеннің бойында қаз қатар тізілген қоралар мен әдемі заманауи үйлерді көргенде, еріксіз ойыңызда: — бұл демалыс орны ма? –сұрақ туары сөзсіз. Иә, біздің бұл суреттеуіміз тым әсірелеу сияқты болып көрінер. Дегенмен, барып өз көзімізбен көргесін жазып отырмыз. Мақаламыздың негізіне қайта оралайық. Қыстақта 200 бас қазақтың асыл тұқымды ақбас малына арналған қоралар мен бордақылау орындары да бар. Сондай-ақ бие байлайтын орын мен атқораны да көруге болады. Малға қажетті жем сақтап оны тартатын механизм орналасқан ангар салынған. Малдың жағдайын бақылайтын ветеринар дәрігер тартылып, арнайы малды зерттейтін және емдейтін лабаратория да орналасқан. Мал күтімі, азық беру және мал көңін шығаруда қол күшінен арылтып, бәрін техника шешкен. Қыстақта орналасқан үйдің ішін айтпағанда айналасына тал-теректер егіліп, баққа айналуда. Өз иелігіндегі қыстақтарды аралатып көрсеткен Нұрлан қазталовтық шаруалармен әңгімелесіп, еңбек тәжірибесімен бөлісіп: — Шындығына келсе, бұл менің бизнесімнің негізгісі емес. Өзім ауылда туып-өскесін малдың не екенін білемін ғой. Бастапқыда балаларымды ауыл өміріне және еңбекке тәрбиелеу үшін атакәсіп мал өсіруді қолға алдым. Шаруамды бастамас бұрын шетелдерді аралап, олардың озық технологиялары мен тәжірибелерін байқадым. Расын айтса мал өсіруді қолға алып отырған Америка, Автралия, Аргентина, Жапония сияқты елдерден үйренетіні де, жиренетіні де бар. Ойлана келе еліміздің бренді саналатын ақбас сыйырды өсіруді қолға алдым. Менің алдағы мақсатым – малдың санымен емес сапасымен өнім алып, шетелдің тәжірибесінде ірі-қараны 100 пайыз өңдеуді жолға қою. Яғни, тек қана еті емес, терісін, сүйегін, ішкі органдарын бәрін де өңдеу. Қазіргі күнде қытайлықтар малды 100 пайыз өңдеуде жақсы жетістіктерге жетіп отыр. Сонда ғана біздің малдың құны жоғарлайтын болады.  Егер осы жұмыстар жүзеге асса бір бас малдың құнын 15 мың долларға дейін жеткізуге болады. Жақында менің шаруашылығымда Ресейдің астанасы Москвадан келген қонақтар болды. Олар да қазақтың ақбас сыйырының етіне қызығып отыр. Себебі – біздің малдың етінде ешқандай қоспа мен концентранттар жоқ. Таза мәрмәр ет дайындауға мүмкіндік бар. Далада еркін жайылған малдың етінде табиғи элементтер ғана болады. Ендігі бір жүзеге асатын шаруалардың бірі – қыстақтың айналасын демалыс зонасына айналдыру. Биылғы жылы 500  түп жеміс ағаштарын ектік. Ағаштарды тамшылату әдісімен суарамыз. Быкова өзенінің жағасынан жағажай жасақтап жатырмыз. Қыстақтың қасынан туристер келіп демалатын үйлерді де салуды жоспарлап отырмын. Оған қажетті коммуникацияларды тартып қойдық. Нәтижесінде, мында демалуға келген туристер таза табиғи сүт, қымыз ішіп, таза мәрмәр ет жеп, таза ауда демалыстарын өткізетін болады. Бұл жердің экологиясы да таза болмақ. Мұннан шыққан қатты және сүйық қалдықтарды арнайы полигондарға алып кетілсе, ал малдың көңін егіс даласына тыңайтқыш ретінде шашылады. Мал бағатын жұмысшыларға келсек, олар вахтамен қызмет жасайды. Жататын орны, тамағы, киімін мекеме өз мойнына алған. Барлық керекті жағдай жасалған. Тек еңбек ету керек, — деген ойын ортаға салды. Міне, ата кәсіпті дөңгелетіп отырған азаматтың бүгінгі тыныс-тіршілігі осындай. Қазталовтан барған шаруалар да таңданыстарын жасыра алмады. Нұрлыбай Жолдыбаев, «Бауырларым – Нарым» шаруа қожалығының жетекшісі, аудандық мәслихат депутаты: — Бүгінгі заманға сай мал бағуды жетілдіріп жатырған Нұрлан ағамыздың тірлігіне риза болдым. Ата кәсіпті жетілдіріп қана қоймай, алға дамытуды мақсат етіп отыр. Біраз нәрсе үйренуге болары сөзсіз. Алдағы жұмысына сәттілік тілеймін! Қуаныш Ермеков, «Ерқанат» шаруа қожалығының жетекшісі: — Міне, Нұрлан ағамыздың еңбегі мен көп жылғы тәжірибесінің жемісі болған ісіне куә болдық. Әсіресе біз сияқты жас шаруаларға осындай нәтижелі істер қажет деп ойлаймын. Әсіресе, Нұрлан ағамыздай ауыл шаруашылық саласына жаңа технологияларды енгізу арқылы жұмыстану бүгінгі заманның талабы болмақ. Алдыңғы қатардағы шаруашылық басшысымен болған кездесуде Қазталов ауданының әкімі Абат Шыныбеков: — Елімізде ауыл шаруашылық саласына қомақты қаржылар құйылып, қолдау білдіріліп жатыр. Міне, біз бүгін Нұрланның жемісті еңбегін көріп отырмыз. Біз осы жерге Қазталов ауданындағы белді деген шаруа қожалық жетекшілері мен ауыл шаруашылық саласының мамандарын жинап отырмыз. Тәжірибе алмассын, осындай жұмыстарды көрсін деген мақсатта. Мал шаруашылығына қаржы салмайынша даму да болмайтыны анық. Әрине, әр шаруашылықтың қаржылық потенциалы әртүрлі екені анық. Дегенмен, шаруашылықтар мүмкіндігінше осы шаруашылықтың тәжіриебісін өздеріне алса, оң нәтиже болады. Соының ішінде Қазталов ауданында мал шаруашылығын дамытуға толық мүмкіндік бар. Бұл бағытта жеріміз де, малымыз да жеткілікті. Тек, осы саланы бүгінгі заманға сай дамытуымыз қажет,-деді. Елбасымыз: «Ауыл шаруашылығы – ел экономикасының жаңа драйвері болуы керек» — деп атап көрсеткен болатын. Ауыл шаруашлық саласының дамуына үлес қосып жатырған Нұрландай азаматтар көп болса, еліміздің қарыштап дамитыны анық.

Қайрат ЖАҚЫП


«ӨСУ ВЕТОРЫ» КҮЗГІ ЛАГЕРІ

Күні: , 10 рет оқылды

1 қараша күні ауданымызда тұңғыш рет мектеп директорларына арналған «Өсу векторы» күзгі лагері өз жалауын көтерді. Қазталов аудандық білім беру бөлімінің ұйымдастыруымен оздырылып жатырған «Өсу векторы» күзгі лагерінің жұмысы – мектеп басшыларының кәсіби шеберлігін арттыру, менеджменттегі жаңа теxнологиялармен таныстыру, білім саласындағы өзгерістерді енгізудің тиімді жолдарын табу, «Руxани жаңғыру» жалпыұлттық идеясының құндылықтарын тәрбие үрдісінде жүзеге асыру, «Назарбаев зияткерлік мектептері» тәжірибелерін жалпы білім беретін мектептерге енгізу мақсатында мектеп басшыларына арналған. Жобаның ашылу салтанатына қатысқан аудан әкімінің орынбасары Зәйлім Мажитова ауданымызда алғаш рет өткізіліп жатырған шараның ашылуымен құттықтаса, облыстық білім басқармасының басшысы Шолпан Қадырова ауданымыздағы «Өсу векторы» күзгі лагері жобасының жетекшісі Нұрлығали Дүйсековке арнайы кубок табыс етті. Аудан орталығында өтіп жатырған «Өсу векторы» күзгі лагерінде жоспарға сай сұхбаттасу алаңдары ұйымдастырылды. Сұхбат алаңында қатысушылар облыс ақыны Сәрсенғали Бисенғалиевпен кездесіп, ақынның тағылымы мен тәлімі мол қызықты әңгімелеріне қанығып, ақынның өзі шығарған авторлық әндеріне де тыңдады. Сонымен қатар Сәрсенғали аға қойылған сұрақтарға тұшымды жауаптар беріп, халық қазынасы бата туралы кеңінен айтып, күзгі лагерде бас қосушыларға ақ батасын берді. Сұхбат алаңына аудан әкімі Абат Шыныбеков те қатысты. Абат Абайұлы ашық алаңда мектеп директорларымен әңгімесін Елбасының биылғы Жолдауында айтылған «Ұстаз мәртебесін» көтеру туралы міндеттен бастап, алдағы уақытта ұстаз мәртебесі туралы арнайы қабылданатын заңға қатысты әрбір мұғалім өз пікірін білдіру керектігін атап өтті. Сонымен қатар аудан әкімі: — Біздер бүгінгі таңда жобалық менеджмент пен жобалық басқаруға көшуіміз керек. Ауданымыздың өзінде биылғы жылы ауқымды біраз жобалар жүзеге асып жатыр. Сіздер де өздеріңіз басқарып отырған мектептеріңізде тек директор ғана емес, білікті менеджер болуларыңыз қажет. Сондай-ақ мектептеріңіздің болашағы мен дамуына бастау болатын жобалар жасақтаңыздар. Сол жобаны жүзеге асыра отырып, білім сапасы мен оқушылардың біліктілігін арттыруымыз — басты мақсатымыз,- деді. Сұхбат алаңына қатысушылар аудан басшысына өз сұрақтарын қойып, айтылған әңгімеге қатысты пікірлерін білдірді. Екі күнге созылған күзгі лагерьде Дебат және Stand-Up қатысушыларымен ойынға әзірлік, «READx» жобасы, Психологиялық жайлылық аймағы, Инновациялық жобалар: «Белсенді оқыту әдістері», «Тәрбие жұмысы Назарбаева интелектуалдық мектебінің» көзімен сияқты қызықты тренингтер ұйымдастырылды. Лагерьде Орал қаласынан арнайы келген блогер, танымал журналист, «Жайық Пресс» медиахолдингінің ақпарат орталығының жетекшісі Нұрлыбек Рахманов мектеп директорларымен сұхбат алаңында кездесіп, БАҚ құралдарында, баспасөз беттерінде және әлеуметтік желілерде білім саласындағы жетістіктерді көрсетудің ерекшеліктері туралы түсіндірді. «Өсу векторы» күзгі лагерінде уақыттарын тиімді және пайдалы кеңестер алған қатысушыларға арнайы сертификаттар мен естелік сыйлықтар табыс етілді.

Қайрат ЖАҚЫП


МАЛ БАҚҚАН СОҢ АСЫЛТҰҚЫМДЫСЫН ӨСІРГЕН ТИІМДІ

Күні: , 10 рет оқылды

Бір пайда болса, асылтұқымды малдан бар. Ауданымызға қарасты Ақпәтер ауылының «Бейназар-Б» шаруа қожалығы осыны ұққан. Қожалық жетекшісі Бейбіт Өтеғұлов Елбасы саясатын мықтап қолдаушылардың санатында. Етті-сүтті мал өсіріп, етін экспорттау туралы тұжырымға да жақ. Ірі қараның Ангус деп аталатын асылтұқымдысын өріске өргізіп отыр. 2002 жылы құрылған «Бейназар-Б» шаруа қожалығы бүгіндн ауданымыздағы алдыңғы қатардағы шаруашылықтардың бірі. «Мал баққанға бітеді» демекші бүгінде қарамағында 700 бас ірі қара малы, 1500 бас қой төлі мен 400 бастай Қамбар атаның түлегін өргізіп, пайдасын көріп отыр. Елбасының асыл тұқымды мал өсіріп, ет экспортын дамыту бағытындағы тапсырмасына өз үлесін қосу мақсатында Бейбіт Өтеғұлов биыл 100 бас ангустің қашары мен 8 бас бұқасын сатып алған. Ғалымдардың сараптауынша, салмақ қосу, ет сапасы мен дене пішінінің жұмырлығы бойынша әлемде бірінші орында тұрған абердин-ангус ұсақталып кеткен өзге тұқымды малды асылдандыруға да тиімді. Сол себепті Бейбіт ауылдағы малды тұқымдық түрлендіруге үлесін қоспақшы. Төлінің тез өсетінімен ерекшеленетін ангус қақаған аяз бен аптап ыстыққа шыдамды, әрі ауруға төзімді болып келеді екен. Жалпы, «Ангус» тұқымы – тез өсіп жетілетін, мүйізсіз сиыр. «Абердин-Ангус» етті келеді. Аналықтарының орташа тірідей салмағы 550- 600 килоны құраса, бұқаларының салмағы 800-850 килоны құрайды екен. Ауданымыздың шаруалары қызығушылық таныта бастады. Бұған дейін Серік Темірханов жетекшілік ететін шаруа қожалығы алса, бүгінде солардың қатарын «Бейназар-Б» шаруа қожалығы толықтырып отыр. -Ақтөбенің «АкТеп» ЖШС-гінен бұл малдарды жеті жылға келісім-шартпен жалға алып отырмыз. Пайдасы бар деп есептейміз. Алдағы уақытта бәрі жақсы болып, төліміз өсіп жатырса, тағы да аламыз ба деген ойымыз бар. Жоспарымыз асыл тұқымды мал басын көбейту,-дейді бізбен әңгімелескен «Бейназар-Б» шаруа қожалығының жетекшісі.

Тұрарбек АҚМЫРЗА


«ҒАСЫРЛАР ТОЛҒАУЫН ТЕРБЕТКЕН, ЖАСАЙ БЕР, АЛМА МЕКТЕБІ!»

Күні: , 12 рет оқылды

А.Оразбаева атындағы орта жалпы білім беретін мектебінің 150 жылдығына арналған «Ғасырлар толғауын тербеткен, жасай бер, Алма мектебі!» тақырыбындағы мерекелік шара өтті. Мерекелік шара мектеп түлегі Асыланбек Губашевтың мектептің 150 жылдығына арналған деректі фильмі көрсетілуімен бастау алды. А.Оразбаева атындағы орта жалпы білім беретін мектебінің 150 жылдық мерейтойына арналған салтанатты шарада Қазталов ауданының әкімі Абат Шыныбеков, Батыс Қазақстан облысы педагог кадрлардың кәсіподақ төрағасы Марат Даупаев, Батыс Қазақстан облысы Білім басқармасының басшысы Шолпан Қадырова құттықтау сөз сөйлеп, ыстық лебіздерін жеткізді. Алыстан сағынышқа толы арнайы құттықтаулардың саны толассыз еді.. Желі есіліп жеткен жеделхаттың бірі – мектеп түлегі, ҚР Парламент Мәжілісінің депутаты Қабиболла Жақыповтың жеделхаты болды. «Елім» деп соққан жүректеріне сағыныш сазын сыйдыра білген шақырулы қонақтар атынан Қазақстан Мемлекеттік банк және қоғамдық қызмет көрсету қызметкерлерінің салалық кәсіподағының орталық комитетінің төрағасы Мирболат Жақыпов, Қазақстан Республикасы Президенті Архиві директорының орынбасары Досқазы Сүйінішев, мектеп түлегі Эрнст Сарсекеновтер құттықтау сөз сөйледі. А. Оразбаева атындағы мектептен білім алған түлектер қазіргі кезде сан түрлі салаларда қызмет атқаруда.Республикалық «Егемен Қазақстан» газетінің Ақтөбе облысы бойынша тілшісі, ҚР Ақпарат саласының үздігі Темір Құсайнов, Ұлттық ақпараттандыру орталығының президенті, педагогика ғылымдарының докторы, халықаралық ақпараттандыру академиясының академигі Альмира Ізбасарқызы, мектеп түлегі, Орал қаласындағы №36 М.Ихсанов атындағы жалпы орта білім беретін мектебінің директоры Азима Губашевалар әр жылғы түлектер атынан құттықтау сөз сөйлеп, мектепке өз сыйларын тарту етті. Алтын ұя мектебін осыдан 50 жыл бұрын бітіріп, еліміздің түкпір-түкпірінде қызмет етіп жүрген, жүректерінде туған елге, оқыған мектебіне деген сүйіспеншілігін арқалап келген ел азаматтары да осындай ауқымды шара ұйымдастырып жатырған мектеп ұжымына алғыстарын айтып, ризашылықтарын білдірді. Бүгінгі күні мектепте абыройлы қызмет етіп жүрген мектеп басшысы Алия Гусманова: — Бұл күнде мектептің 150 жылдығына арналған іс-шаралар арнайы жоспар бойынша жыл бойына ұйымдастырылды.А.Оразбаеваның 120 жылдығына арналған ғылыми-тәжірибелік конференция, ардагер ұстаздарды ұлықтау кештерін атап айтуға болады. Бұл шараларға мектеп оқушылары, мектеп түлектері, мұғалімдер, ата-аналар, аудан тұрғындары, облыс көлеміндегі ғалымдар мен музей қызметкерлері тартылды. Мектебімізде 81 педагог, жоғары санатты-14, І санатты-29, ІІ санатты-28, жаңартылған білім беру мазмұны курсымен-42, 4-мектеп тренері, 5-үштілділік курспен қамтылған мұғалімдер қызмет етеді. Мектептің негізгі бағыты-бірлескен оқу ортасын құру, табысты оқыта отырып, құзыретті тұлға қалыптастыру. Сол үшін де еңбектеніп келеміз. Тарихы тереңге жайылған мектеп ұжымының жұмысы алға басады деп сіздерді сендіргім келеді. Әлі де алға қарыштап дамимыз деген ойдамын. Бүгінгі ауқымды шараға қатысып отырғандарыңызға мың да бір алғыс. Келгендеріңізге рахмет. Мереке құтты болсын, ағайын!, — деп мерейтойдың қорытынды сөзін сөйледі. Мерекелік шара барысында әннен шашу шашылып, әдемі би арқылы көріністер көрсетілді.

Гүлнұр ҚАЗБЕК


Журналистер арасында «Еркін сөз-2018» республикалық шығармашылық байқауы жарияланды

Күні: , 22 рет оқылды

Жалпы ережелер «Еркін сөз» журналистер арасында өтетін байқауы (бұдан әрі – Байқау) журналистердің шығармашылық қарымын күшейту және журналистерді ынталандыру мақсатында өтеді. Байқаудың міндеттері: Қазақ журналистерінің кәсіби біліктілігін көтеру; Журналистерді ынталандыру; Сыйлықтарды тағайындау және дипломдар мен бағалы сыйлықтарды тапсыру 16 желтоқсан Қазақстан Республикасының Тәуелсіздік күнімен және Қаржыгерлер күнімен сабақтастырылады. Жеңімпаздарды айқындау және сыйлықтарды тағайындау Байқау комиссиясының шешімімен жүзеге асырылады. Байқау комиссиясының құрамына белгілі журналистер, мемлекеттік және қоғам қайраткерлері, үкіметтік емес ұйымдардың өкілдері кіре алады. Байқау комиссиясы жеңіске талпынған БАҚ өкілдерін іріктеу барысында келесі шарттарды басшылыққа алады: материалдардың объективтілігі; кәсіби шеберлігі; мәселенің көтерілуі және оны жан-жақты ашып көрсету; материалдар туғызған қоғамдық резонанс; жұмыстардың шығармашылық толымдығы; Байқауды өткізуді үйлестіру. Байқауды өткізу жұмысын үйлестіру  «Түркітілдес журналистер қоры» ҚҚ президенті бекітетін Байқаудың ұйымдастыру комитетіне (бұдан әрі – Ұйымдастыру комитеті) жүктеледі. Ашықтық. Осы Ереже байқауға қатысуға үміткер, қызығушылық танытушы тұлғалардың барлығына танысу үшін ұсынылады. Ереже БАҚ-та жарияланады. Жеңімпаздар келесі байқауға 2 жылдан кейін ғана қатысуға құқылы. Байқауға қатысу шарттары Байқауға қатысушылар. Байқауға қатысуға қазақ тілінде жазатын және хабар тарататын барлық республикалық, халықаралық және аймақтық БАҚ журналистері шақырылады. Ұсынылатын жұмыстардың тақырыбы. Байқауға қатысуға қаржылық, экономикалық әлеуметтік, шағын және орта кәсіпкерлікті дамыту тақырыптарына негізделген материалдар қабылданады. 2018 жылдың 01 қаңтарынан 2018 жылдың 27 қарашасына дейін жарияланған немесе эфирге шыққан материалдар, сондай-ақ жарияланымдар мен бағдарламалар циклдері түрлі жанрларда (очерк, сұхбат, мақала, телевизиялық бағдарламалар, журналистік зерттеулер тағы басқалары) қабылданады. Байқауға ұсынылатын материалдарға қойылатын талаптар. Жарияланымдар түпнұсқа немесе материалдардың ксерокөшірмесі түрінде (басылымның атауы, күні және автормен байланыс жасау мәліметтері толық көрсетіле отырып) ұсынылуы тиіс. Дыбыстық-визуалды жұмыстар эфирлік анықтамамен бірге телевизиялық бағдарламаның көшірмесі түрінде (cd/dvd дискілерінде, flash-тасымалдаушыларында) ұсынылуы тиіс. Электрондық БАҚ журналистері жарияланған материалдардың көшірмесін интернет-сайтта орналастырылғанын растап жолдауы қажет. Материалдар мемлекеттік  тілде қабылданады. Байқауға материалдарды қабылдаудың соңғы күні – 2018 жылдың 27 қарашасы, сағат 20:00-ге дейін. Ұсынылатын материалдарға мыналар қоса беріледі: журналист туралы қысқаша өмірбаяндық ақпарат, журналистің 3х4 см. мөлшеріндегі фотосуреті, ақпараттық материалдар тізімі. Байқауға ұсынылатын жұмыстардың саны. Бір журналист ұсынатын материалдардың саны 1-ден аспайды. Жұмыстар байқаудың Ұйымдастыру комитетіне хабарландыруда көрсетілген мерзімнен кешіктірілмей ұсынылады. Байқау тақырыбына сәйкес емес және талаптарға сай келмейтін материалдар, ұсыну мерзімі аяқталғаннан кейін келіп түскен жұмыстар байқауға жіберілмейді. Байқауға ұсынылған материалдар қайтарылып берілмейді. Байқаудың өту кезеңдері Алғашқы кезең. Алматы қаласында Баспасөз мәслихаты өткізіліп, БАҚ өкілдеріне байқауды өткізу туралы және оған қатысу шарттары туралы хабарландыру жарияланады. Байқауды өткізудің негізгі кезеңі. Байқау материалдары байқаудың Ұйымдастыру комитетінің мекен-жайына немесе электронды поштаға 2018 жылдың 27 қарашасына дейін келіп түседі. Байқауға берілген өтініштерді қараудың регламентін Байқау комиссиясы белгілейді. Байқау комиссиясы өз жұмысының нәтижесі бойынша байқау лауреаттарын айқындайды. Қорытындылау. Жеңімпаздарды жариялау келесі номинациялар бойынша байқауды жалпы қорытындылау шеңберінде іске асырылады: Үздік видеосюжет (телевидение); Үздік мақала (газет); Сайттағы үздік мақала; Жеңімпаздарды марапаттау. Байқау материалдарын бағалау және іріктеу процедурасы Байқау материалдарын бағалау барысында келесі шарттар назарға алынады: белгіленген тақырыпқа сәйкестік; жаңашылдық; мәселені талдаудың тереңдігі; нақтылық пен логикалық негізделуі; мазмұндау стилі мен тілі, техникалық сапасы; авторлық тұжырымдаманың дербестігі; жарияланымда немесе дыбыстық-визуалдық жұмыста мазмұндалған ақпараттың нақтылығы мен шынайылығы; журналистиканың этикалық принциптеріне сәйкестігі; сыртқы безендірілуі. Ұйымдастыру комитетінің құқықтары мен міндеттері Ұйымдастыру комитеті: Байқау туралы осы ереженің талаптарына сәйкесіздіктерді негізге ала отырып, үміткерді байқауға қабылдамауға; қандай да бір үміткерге қатысты Байқау комиссиясының мүшесі өз өкілеттіктерін асыра пайдаланғаны анықталған кезеңде Байқау қорытындыларын жоққа шығаруға құқылы. Ұйымдастыру комитетінің міндеттері: А) Барлық қатысушылар үшін тең жағдай жасау; Ә) Байқауды өткізудің жариялылығын қамтамасыз ету; Б) Байқаудың нәтижелері туралы мәліметтердің уақытынан бұрын жария етілуіне жол бермеу. Байқау комиссиясының құқықтары мен міндеттері Байқау комиссиясы мыналарды іске асыруға құқылы: Байқауға түскен материалдарға баға беру; Жеңімпаздарға сыйлықтар тағайындай отырып, байқауды қорытындылау. Байқау комиссиясының міндеттері: барлық қатысушылар үшін тең жағдай жасау; байқаудың нәтижелері туралы мәліметтердің уақытынан бұрын жария етілуіне жол бермеу. *Байқау комиссиясы мүшесінің байқауға қатысуына жол берілмейді. Қатысушылардың құқықтары, міндеттері мен жауапкершілігі Байқауға қатысушылар мыналарды іске асыруға құқылы: А) Байқаудың өту шарттары мен тәртібі туралы ақпараттар алу; Ә) Ұйымдастыру комитетінен осы Ереженің тармақтарына түсіндіруді сұрау; Б) Байқауға қатысу үшін материалдар жолдау. Байқауға қатысушылардың міндеттері: А) Байқаудың мән-жайымен алдын ала танысу, Байқауға қатысу үшін қойылатын талаптарды зерттеу; Ә) Осы Ереженің талаптарына сәйкес рәсімделген материалдарды уақытылы ұсыну; Б) Осы Ережеде қарастырылған ережелер мен процедураларды сақтау. Байқауға қатысушылар келесілер үшін жауапты: А) Материалдар мен түйіндемеде көрсетілген ақпараттардың шынайылығына қойылатын талаптарды бұзғаны үшін; Ә) Осы Ережеде белгіленген шарттарды, ережелер мен процедураларды сақтамағаны үшін. Медиаресурстар Байқауға ақпараттық қолдау жасауды  ақпараттық серіктестіктер қамтамасыз етеді. Ұйымдастырушы туралы байланыс ақпараты Байқаудың ұйымдастыру комитеті: Алматы қаласы, «Түркітілдес журналистер қоры» ҚҚ, Алматы қаласы, 050008, Клочков көшесі, 21/29. Байланыс телефоны: + 7 778 878 34 08; электронды пошта:  erkinsoz2018@gmail.com «Түркітілдес журналистер қоры» ҚҚ

ЖАС АҚЫНДАРМЕН ЖҮЗДЕСКЕН АҚЫН ДАРИҒА

Күні: , 60 рет оқылды

4 қазан күні ақын жерлесіміз Дариға Мұштанова туған жерге ат басын тіреді. Осы орайда К.Меңдəлиев мектебінде жерлес ақынымыз Дариға Мұштановаға арналған «Ақжайықтың Дариғасы» атты əдеби-сазды кеш өтті. Əдеби кешке жиналған өлең өлкесінің өрендері ақынның өнердегі жолын сахналап, көрерменге ұсынды. «Дара жолдың» ізімен жалғасқан кеш ақын жолындағы əңгімелер өрбіді. Өмірінің қиын да қызықты естеліктерімен бөліскен Дариға ақын бір сəтте оқырмандарының жүрегіңе рухани азық сыйлады. Сондай-ақ жан-жақтан жиналған жас талантты ақындарымыз да өз туындыларын оқып, ақын жүрегінен жол тапты. Əдеби кеште аудан əкімінің орынбасары Зəйлім Мəжитова, К.Меңдəлиев мектебінің директоры Салтанат Өтеғұлова сөз алып, мерекемен құттықтап, ақын апамызға алғысхат табыстады. Әдеби-сазды кештен соң, ақын Дариға Мұштанова мен аудан әкімінің орынбасары Зәйлім Мәжитова К.Меңдәлиев мектебінде жасақталынған «Мұра» жас ақындар сыныбының алғашқы лентасын қиды. Жас ақындар сыныбының тұсауын кескен ақын Дариға өлең баспалдағына енді қадам басқан оқушыларға ақ жол тіледі. «Қаламдарың қарымды, жырларың жалынды болсын» — деп бата берді. «Мұра» жас ақындар сыныбына К.Меңдәлиев мектебінің жас ұстазы Ардақ Жангелді жетекшілік етеді. «Бұлақ көрсең көзін аш» дегендей дарынды, талантты оқушыларды дер кезінде байқап талантын танытып, көпшілікке таныстыру ұстаздардың міндеті деп білеміз. Жалпақтал мәдениет үйінде ақын Дариға Мұштанованың «Аңыз болған абысындар» кітабының таныстырылымы өтті. Кеште сөз алған аудан әкімі Абат Шыныбеков: — Бүгін Жалпақтал ауылына жыр жауған күн деп айтуға болады. Енді міне мәдениет үйінде өзіңіздің өміршең туындыларыңызды сүйіп оқитын оқырмандарыңыз жиналып тұр. Сіз «Аңыз болған абысындар» прозасы арқылы оқырмандарыңыздың жүрегінен жол таптыңыз. Бұл шығарма шынайы өмірмен байланыстырып жазылған. Бұл түйсінерлік туынды. Сіздің жүрегіңізден шыққан туынды жүректерге жетті. Ендеше, сізге аудан халқының атынан ризашылығымызды жеткіземіз, — деген тілегін білдіріп, ақын апамызға ұлттық нақыштағы комзол кигізді. Кеште К.Меңдәлиев мектебінің ұстазы Гүлмира Темірғалиева «Аңыз болған абысындар» кітабынан шолу жасаса, мәдениет үйінің актрисасы Шалқыма Мерқұлова осы шығармадағы Сақып пен Қизаның 5 бірдей баласын ажал жалмаған жағдайын әсерлі сахналап, барлық көрерменді жылатты. Сондай-ақ кеште аудан мектептерінен келген мектеп оқушылары ақын өлеңдерін оқыса, ақынның сөзіне жазылған «Жалпақталым», «Ұстаз бен шәкірт» әндері де шырқалды. Кешке Х.Бөкеева атындағы облыстық қазақ драма театрының әртісі Нұргүл Жұбатова, дәстүрлі әнші Күләш Қуанышқалиева, Ғарифолла Құрманғалиев атындағы облыстық филармонияның әншісі Еркін Өтегенов сынды өнер жұлдыздары өнерлерін көрсетіп, көрерменнің көңілін бір серпілтіп тастады. Туған еліне құнды дүниемен келген ақын апамыз елге деген сағынышын жасырып қалмады. — Сіздер маған сәуле тәріздісіздер. Айналама шуақ беріп, шабыт сыйлайсыздар. «Аңыз болған абысындар» прозасының өмірге келуіне осы абысындардың келіні Рысты Қайсағалиева замандасым арқау болды. Рысты арнайы хабарласып, үш анасының өмірдерегін баяндап берді. Сөйтіп арнайы жол түсіріп Қараоба ауылына бардым. Сол аналарымыздың бейітіне барып, құран бағыштадық. Осы кісілердің көзін көрген үлкендерден де деректер алып, жазуды бастадым. Туынды осылай өмірге келді. Әрине, оңай болмады. Өзім де бұл туындыны жазғанда көзіме жас алып тұрып жаздым. Оқырмандарыма да солай жеткенін осы кештен байқап отырмын. Сіздерге мың алғысымды білдерімін, — деп ақын апамыз қуаныштан көзіне еріксіз жас алып, туған ауылының жайсаң жандары мен оқырмандарына ризашылығын білдірді.
Жұлдыз АСҚАР

ХАЛЫҚ САЗЫНА АЙНАЛҒАН ӘН НЕМЕСЕ ӘКЕГЕ ДЕГЕН САҒЫНЫШ

Күні: , 58 рет оқылды

Жүректі тербеп күй сынды, Биікке ұшсам сүйсіндің. Мойныңа көптен асылмай, Сағындым, әке, иісіңді,- деп жырланған, халық сазына айналған «Әкем — әнім» әнінің шыққанына міне 40 жыл толып отыр. Алыста жүріп ауылдағы әкесін сағынған бозбала Әділбек жүрегінен шыққан сағынышын әні арқылы қалықтатқан еді. Бұл 1978 жылы Әділбектің Қызылорда қаласындағы Гоголь атындағы педагогикалық институтының музыка факультетінде оқып жүрген кезі еді. Әкесі Нәсекеннің 60 жас мерейтойына бара алмаған Әділбек досы Орынбасар Сүттібаев екеуі осы әнді жазуға бел буады. Фортопиано алдында отырып, талай таңды көзбен атырған қос жігіт «Әкем — әнім» әнін жазып шыққан еді. Бірақ, олар бұл әннің қазақ даласын қалықтап, халықтың жауҺар жырына айналатынын сезбесе керек… «Әкем — әнім» әнінің шырқалғанын 40 жыл толуы мен әннің кейіпкері, Ұлы отан соғысы мен еңбек ардагері, Қазақ ССР-нің еңбек сіңірген мектеп мұғалімі Нәсекен Сүлейменовтің 100 жылдығына арналған еске алу шарасы 3 қазан күні Қазталов ауданы орталығында өтті. Қазақстан Республикасының Мәдениет қайраткері, Қазақстан Республикасының Мәдениет және өнер қоғамдық қорының «Ерекше тұлға» төсбелгісінің иегері, әнші-сазгер, жерлесіміз Әділбек Сүлейменовтің шығармашылыған арналған бұл концерттік бағдарламаның шымылдығы аудандық саз мектебінің хор сыныбы оқушыларының және барабаншылардың орындауындағы Мира Сүйіншәлиеваның сөзіне жазылған ағамыздың «Қазақстан жас ұланы» әні арқылы ашылды. Әуезді әннің құдіретін тек жүрекпен ғана сезіну керек шығар. Ән көңілді ғана ажарландырып қана қоймай, адам абыройын биіктетіп жіберетінін Әділбек Сүлейменовтің шығармашылыған ұғуға болады. Қариялар күні және қайырымдылық айына орайластырылған концертте сазгер ағаның аудандық мәдениет үйі әншілерінің орындауында «Ағаларды еске алу», «Қариялар», «Ауылдастар» әндері шырқалды. Сонымен қатар Қазақстан полициясының гимніне айналған «Полиция мектебі» әнін Әділбек аға жеке дауыста әуелетсе, аудандық ішкі істер бөлімінің ұжымынан құралған хор қосыла асқақтатты. Концертке жиналған көпшілік те Әділбек Сүлейменовтің қанат қаққан қиялмен ұштасқан сазгерлік талантына тәнті болды. Кәусәр сезім мен тояттамас көңілге, қуаныш пен мұңға толы «Кешігіп келген махаббат», «Арман жылдар», «Қоштасудың қиыны-ай» сияқты махаббат әндері сахна төрінен төгіліп шырқалып, тыңдарманды сезімге жетеледі. Кеш қонағы, Республикалық байқаулардың лауреаты, «Ерен еңбегі үшін» мемлекеттік медалінің иегері, әнші Айбар Хайырханов Әділбек ағамыздың «Хадиша апа», «Қазақстан құрылысшылары» әндерін шебер орындап, көрерменнің қошеметіне бөленді. Концерт соңында әкелерге арналған әнұран болған, ғұмырлы әндердің бірегейі, Әділбек Сүлейменовтің төлқұжатына айналған Орынбасар Сүттібаевтың сөзіне жазылған «Әкем — әнім» әні орындалғанда, сүйсінген көрермен ыстық ықыластарын ұзақ соғылған шапалақтары арқылы білдірді. Концерт бітісімен сахна төріне көтерілген аудан әкімі Абат Шыныбеков тамаша шығармашылық кеш сыйлаған Әділбек ағамызға ел атынан алғысын білдіріп, өнер иесінің иығына шапан жауып, алғыс хат табыстады. Міне, құт дарыған қос өзеннің ортасында ән қалықтап, төрткүл дүниені ән арқылы бағындырған өнер иесінің шығармашылық концерті жоғары деңгейде өткенін мақтанышпен айта аламыз. Концерттен ұмытылмас әсер алып, көтеріңкі көңіл күйде тарап жатқан ауылдастардың бірі – Гүлнұр Иманғалиеваны әңгімеге тартқанымызда,- Әділбек ағамыздың шығармашылық кеші керемет өтті. Ағамыздың шығармашылығының шыңы, барша қазақ жұрты шырқайтын «Әкем — әнім» әнінің ерекшелігін атап айтқым келеді. Сондай-ақ кеш барысында Әділбек ағанның басқа да біз естімеген әндерін тыңдап, үлкен әсер алдым. Осындай тума таланттары бар киелі Қазталов топырағы жасай берсін! — деген көңілін жайып салды.

Қайрат ЖАҚЫП


АЛҒАЙДА «МӘРМӘР ЕТ» ФЕСТИВАЛІ ӨТТІ

Күні: , 32 рет оқылды

Қазақ халқының басты тағамы – ет. Ұлттық тағамдарымыздың басым көпшілігі еттен жасалатындықтан одан дәмді әрі қуатты ас жоқ. Қазақ баласын еттің түр-түрімен таң қалдыра алмайсыз. Дегенмен соңғы бес-алты жылда біздің нарықта «мәрмәр сиыр еті» деген жаңа ұғым пайда болды. Сонымен «мәрмәр сиыр еті» деген не? Бұл сұрақтың жауабын көрші Ресей жеріне барған сапарымызда таптық. Әңгімені басынан бастасақ, 29 қыркүйек күні Ресейдің Саратов облысына қарасты Александров-Гай ауданында «Мәрмәр ет» фестивалі оздырылды. Осы фестивальге Қазталов ауданы да арнайы шақырту алып, аудан әкімінің орынбасары Зәйлім Мажитова бастаған қазталовтық делегация қатысып қайтты. Фестиваль Алғай жерінде осымен екінші рет ұйымдастырылып отыр. Жоғары деңгейде өткен фестивальге Саратов облысының губернаторы Валерий Радаевтың өзі қатысып, қазталовтықтарға деген ыстық ықыласын білдірді. Байқағанымыздай Александров-Гай ауданы ауыл шаруашылық саласындағы барлық әлеуетін осы шараға жұмылдырып, келген қонақтар мен жиылған көпшіліктің алдында «мәрмәр еттің» қасиетін паш етті. Аудан орталығындағы орталық саябақта «мәрмәр ет» фестиваліне арналған ет жәрмеңкесі, кәуап, палау, қуырдақ пісіру сайыстары, ауыл шаруашылық өнімдерінің көрмесі, асыл тұқымды малдардың көрмесі керемет ұйымдастырылған. «Мәрмәр ет» жәрмеңкесінде аудандағы шаруа қожалықтар сапалы еттің түр-түрін ұсынып, тиімді бағамен сатып жатты. Жәрмеңке басында мамандардан XIX ғасырдың алпысыншы жылдары пайда болған бұл деликатестің бүгінде 120-дан астам түрі бар екенін және бұл ет түрінің дәмі, түсі, өңі туралы кеңінен ақпар алдық. Мәрмәр еттің ерекшелігі – бұлшықеттегі май қабаттары етті сөлді әрі жұмсақ етеді екен. Бұндай сапалы етті асыл тұқымды Ангус, Герефорд және өзіміздің Ақбас сиырды күтіп-баптау арқылы өндіруге болатынына көз жеткіздік. Нарықта жоғары бағаланатын «мәрмәр еттің» бұл жәрмеңкеде орны бөлек екендігіне көз жеткіздік. Сонымен қатар фестиваль аясында саябақта театрландырылған қойылым, концерттік, спорттық бағдарламалар және тосаптар көрмесі, палау, стейк сияқты дәмді ет тағамдары жиналған көпшілікке ұсынылды. Сондай-ақ фестивальде спорттық күш экстримі сайысында жерлесіміз Жасұлан Құлқайыровтың асығы алшысынан тұрып, білек күшінің мықтылығын дәлелдеп, екінші орынға тұрақтады. Қазақ елінің намысын қорғаған жерлесіміз жүлделі орынға тігілген «мәрмәр етке» ие болды. Сондай-ақ қой көтеру сайысында да Жасұлан қарсыластарының бәрін шаң қаптырып, бас жүлдеге тігілген қой баласын қанжығасына байлады. «Бәрін айт та, бірін айт» демекші, бұл фестивальден үлкен әсер алып қайттық. Осындай нәтижеге жетіп жатырған көршілеріміздің мұндай тәжірибесін біздің де ауданда жүзеге асыруға болатынына ой түйдік. Сәтімен болғай!

Қайрат ЖАҚЫП


БАУЫРЖАН МЕН ЕРЖАН ЖЕҢІМПАЗ. «ҚАРЛЫҒАШ» ТАҒЫ ДА САМҒАДЫ

Күні: , 44 рет оқылды

Облыстық «Дала дарындары» жастар шығармашылығы фестивалі өз мәресіне жетті. Үстіміздегі жылдың 26 қыркүйек күні Жастар мәдениет үйінде Батыс Қазақстан облысының мәдениет басқармасының қолдауымен, облыстық халық шығармашылығы орталығының ұйымдастыруымен облыстық «Дала дарындары» жастар шығармашылығы фестивалі оздырылды. Фестиваль облысымыздағы жас өнерпаздардың талантын ұштап, шығармашылығын дамыту, оларды өнер жолында қанаттандыруға қолдау көрсету, талантты жастардың мүмкіндіктерін танытуына зор ықпал етеді. Осындай мақсатта байқау «Әдеби шығарма», «Бейнелеу өнері», «Халық музыкасы – домбыра — күй» және «Халық музыкасы – домбырамен ән салу», «Хореография», «Эстрадалық вокал» аталымдары бойынша жүргізілді. Бойындағы табиғи талантымен қоса, өнерге құштарлығы бар жас өнерпаздарға арналған фестивальге облыс аудандары мен қаламыздан 70-ке тарта үміткер қатысты. «Халық музыкасы – домбырамен ән салу» аталымы бойынша Бауыржан Қыдырғалиев I-ші орын, «Халық музыкасы – домбыра — күй» аталымы бойынша Ержан Құмарғалиев II-ші орынды иеленді. Сонымен қатар Қазталовтық Халықтық «Қарлығаш» би ансамблінің үлкен тобы байқауда жүлделі III- ші орынды иеленіп, аудан мәртебесін тағы бір жоғары көтеріп тастады. Өнер көгінде жүзген жас таланттарға биіктен көріне беріңіздер!- деген тілегімізді жеткіземіз.

«Ауыл айнасы» ақпарат


Қазталов ауданы, Шарафутдинов көшесі 13
zhaik_presscenter@mail.ru
aulainasi@mail.ru

"Ауыл айнасы"

"Ауыл айнасы" газетінің бас редакторы: 8-71144-31-4-68
Тілшілер: 31-4-68, 21-3-70
Жарнама бөлімі: 21-0-42

 

.