АЙМАҚ

СПОРТ

ҚОҒАМ

Құттықтаулар


1441 ШАҢЫРАҚ «АҚБҰЛАҚТЫҢ» ИГІЛІГІН КӨРМЕК

Күні: , 16 рет оқылды

Аудан әкімі Абат Шыныбеков Жалпақтал ауылында болып, ауыл ардагерлерімен және көше тұрғындарымен жүздесті. Кездесу барысында аудан басшысы ауданда атқарылып жатқан шаруаларға тоқталды. — Аудан бойынша елді мекендердің әлеуетін арттыруға, тұрғындардың өмір сүру деңгейін жақсартуға бағытталған жалпы құны 10,9 млрд. теңгені құрайтын 10 жоба іске асуда. Өздеріңіз білетіндей аудан орталығында 87,615 млн. теңге қаражатқа саз мектебінің құрылысы жүріп жатса, Жалпақтал ауылында «Эврика» ЖШС-ы 112,666 млн. теңгеге 12 пәтерлік 2 қабатты тұрғын үйдің құрылысын жүргізуде. Оның сыртында инженерлік-коммуникациялық жұмыстарына 18 млн. теңге қаражат бөлінді. Сонымен қатар 13 елді мекенге көгілдір отын тарту жұмыстары басталып кетті. Осы бағытта 16 елді мекенді газбен қамтуға, атап айтсақ Әбіш, Еламан, Саралжын, Көпкүтір, Аққурай, Хайруш, Саралжын, Қызылту, Қаракөл, Сексенбаев, Мереке, Сатыбалды, Бостандық, Ащысай, Жас, Таңат ауылдарына жобалық-сметалық құжаттамалары жасақталып жатыр. Аталған жұмыстар іске қосылған жағдайда тұрғындардың 79 пайызы таза судың, 77 пайызы көгілдір отынның игілігін көрмек. Алдағы жылы Жалпақтал, Қазталов ауылдарына әмбебап спорт алаңын салуды жоспарлап отырмыз Сонымен қатар жергілікті бюджеттен 2430,3 мың теңге бөлініп, Талдықұдық ауылына «Таза су» қондырғысын орнату жұмыстары жүргізілмек,- деген Абат Абайұлы ақсақалдар мен көше төрағаларының ұсыныс пікірлерін тыңдады. Ал ауыл әкімі Самиғолла Ақмурзин 8 ай ішінде ауылда атқарылған жұмыстарға тоқталса, Жалпақтал коммуналдық шаруашылық мекемесінің басшысының міндетін атқарушы Тілек Ибрашев та хабарлама жасады. «Ақбұлақ» бағдарламасы бойынша Жалпақтал, Қараөзен ауылдарына 360 млн. теңге қаражат қаралып, Жалпақтал ауылының 1208, Қараөзен ауылының 233 тұрғыны «Ақбұлақтың» игілігін көреді деп күтілуде. Тілек Ибрашевтың айтуы бойынша су айдау станциясындағы құрал-жабдықтар түгелдей ауысытырылып, күні бүгін қос ауылға 400 тонна көлемінде су беріліп отыр. Осы кездесу барысында ауыл ардагерлері Нағым Ризуанов, Шынболат Өтешқалиев, Мерғараф Әкімалиев, Кенжебай Үмбетов, Ахметқали Қарағойшин, аудандық мәслихат депутаты Дулат Ихсанов аудан басшысына мал азығы, тұрақтандыру қорының жұмысы жайында және Жалпақтал коммуналдық шаруашылық мекемесінің қазіргі жағдайы жайында сөз қозғап, аудан әкімінен көмек көрсетуін сұрады. Аудан әкімі Абат Шыныбеков айтылған мәселелердің өте дұрыс екенін, олардың өз кезегінде шешілетіндігін айтып, кездесу жиынын қорытындылады.

Тұрарбек ҚАЙЫРҒАЛИҰЛЫ


БАСПАСӨЗ БРИФИНГІ ӨТТІ

Күні: , 30 рет оқылды

4 қыркүйек күні аудан орталығында аудандық ішкі істер бөлімі, жергілікті полиция қызметі басшылары және аудандық білім бөлімінің мамандарының қатысуымен баспасөз брифингі өтті. Брифингке қатысқан қоғамдық ұйым өкілдері, мекеме қызметкерлерінің алдында аудандық ішкі істер бөлімі басшысының уақытша міндетін атқарушы полиция полковнигі Амангелді Убишев, жергілікті полиция қызметінің бастығы полиция майоры Әділ Ғазизовтар құқық бұзушылықтың алдын алу мақсатында ауданымыз бойынша 8 ай ішінде атқарылған жұмыстары туралы айтып өтті. Қысқаша тоқталып өтсек, ауданымыз бойынша 8 айдың ішінде 177 қылмыс фактісі тіркелген. Бұл көрсеткіш былтырғы жылмен салыстырғанда 2 пайызға төмендеген. Тіркелген қылмыстардың ашылу көрсеткіші 91,5 пайызға жетіп отыр. Негізінен алаңдатушылық туғызып, ашылмай отырған қылмыстардың қатарында мал ұрлығының фактілері. Бұл қылмыстармен қоғам болып күресу керектігі туралы айтылды брифингте. Сонымен қатар баспасөз брифингінде аудандық балалар тәрбие орталығының директоры Нұрлан Жасқалиев балалардың жазғы демалысы туралы хабарлама жасады. Оның сөзіне де тоқталсақ, ағымдағы жылдың 1 маусым — 9 тамыз аралығында ауданымызда балаларға арналған 4 жазғы демалыс лагері жұмыс жасап, бұл лагерьлерде 804 оқушы демалған екен. Оқушыларға әр түрлі бағыттарда қызықты делалыстар ұйымдастырылған. Брифинг барысында айтылған мәселелерге қатысты сұрақтар қойылып, тиісті жауаптар берілді.

Қайрат ЖАҚЫП


СӘЛЕМ САҒАН, МЕКТЕБІМ!

Күні: , 14 рет оқылды

Елбасы Н.Назарбаев республиканы əлемдегі бəсекеге қабілетті 30 елдің қатарына енгізу туралы міндет қойған болатын. Білім беру жүйесін жетілдіру осы мақсатқа қол жеткізуде маңызды рөл атқарады. Қазақстанды дамыған елдердің қатарына жеткізетін, терезесін тең ететін – білім. 1 қыркүйек күні шекарада жатырған Көпкүтір елді мекенінің мектебі тоғыз жылдық білім беретін негізгі мектеп болып құрылды. Салтанатты жиынға аудан әкімінің орынбасары Нұретдин Құтқожин, аудандық әдістемелік кабинет меңгерушісі Райгүл Аткешеева, Болашақ ауылдық округінің әкімі Қобылан Тұрақбайұлы қатысып көпкүтірліктерді айтулы қуаныштарымен құттықтады. Сонымен қатар мектептің мерекелік шарасына ақсақалдар алқасының төрағасы Қамидулла атамыз қатысып, білім ордасының лентасын қиды. Білім күні ашылған білім ордасының жетістіктері мол болсын дейміз.

«Ауыл айнасы» ақпарат


ҚУАНЫШҚА ҚУАНЫШ ЖАЛҒАСҚАН КҮН

Күні: , 26 рет оқылды

Білім мерекесі Талдыапан ауылдық округінің орталығы мен барлық елді мекендерде тойланды. Үстеріне мектеп формасын киіп, ақ бантик тағынған қыздар мен сөмке асынған ұлдар ұлағатты ұстаздарына гүл шоқтарын ұсынып жатты. Айтулы шарада ортаға Қазақстан Республикасының Мемлекеттік Туы енгізіліп, мектеп басшысы Руслан Кенжеғалиев жиылған жұртшылықты Білім күнімен құттықтап, оқу ордасының жеткен жетістіктерін сөз етті. “Күш — білімде, білім — кітапта” деген нақылға сүйене отырып, жас буынды жақсы оқып, ел абыройын асқақтата түсе берулеріне тілектестігін білдірді. Сондай-ақ салтанатты шарада округ әкімі Асқар Есқалиев мерекелік жиынға жиналған оқушылар, ұстаздар мен ауыл тұрғындарын жаңа оқу жылының басталуымен құттықтап, өресі биік еліміздің мерейін асыратын азаматтар болуына тілек білдірді. Іс -шарада оқушылар əн шырқап, би биленсе, 1 сынып оқушылары салтанатты алғашқы қоңырауды соқты. Одан кейін ауыл тұрғындары орталық алаңда бой көтерген балалар ойын алаңының ашылуына куə болды. (31 тамыз күні кеште құрылған ойын алаңын бүгін таңертең көрген бүлдіршіндер таңданыстарын жасыра алмай мəз). Ашылу салтанатында сөз алған Талдыапан ауылдық округнің əкімі Асқар Есқалиев ауданнан ең шалғай жатқан талдыапандық бүлдіршіндерге осындай тамаша алаң жасақтауға жағдай жасаған аудан əкімдігіне алғыс айта отырып, ауылдың ажарына ажар қосқан алаңның бүлдіршіндер игілігі үшін ұзақ жылдар қызмет көрсетуіне тілегін білдірді.

«Ауыл айнасы» ақпарат


ЖАҒАЖАЙДА ДЕМАЛЫС АЛАҢЫ АШЫЛДЫ

Күні: , 10 рет оқылды

Қазталов-Жәнібек-Бөкей Орда бағытындағы күре жолдың бойында орналасқан, аудан орталығы Қазталовтан 3 шақырым қашықтықтағы Сарыөзен өзенінің жағалауы халық арасында «үшінші көпір» атауына ие. Тұрғындардың жаз айларында суға түсіп, демалатын сүйікті орыны десе де болады. Демалушыларға қолайлы жағдай туғызуды ойлаған кәсіпкер Сұпығалиевтер әулеті жағажайдың қасынан демалыс алаңын салуды қолға алған болатын. Міне, сол жоба сәтті іске асып, 30 тамыз күні Ата заңымыздың мерекесіне орай жағажайдан демалыс алаңы ашылыды. Демалыс алаңының ашылу салтанатына қатысқан аудан әкімі Абат Шыныбеков жиналған көпшілікті айтулы мерекемен құттықтап, әкесі Ахмет ағамыздың ісін жалғастырып, жаңа кәсіп бастап жатырған Әсетханға ризашылығын білдірді. Сарыөзеннің жағасында орналасқан бұл демалыс алаңы қазіргі заманға сай жабдықталған. Жағажайға тынығуға келгендерге арнап салқындатылған сусындар мен қуырдақ, кәуап секілді тағам түрлері ұсынылмақ. Сонымен қатар аяқ суытуға арналған сәкілер де жасалған. Жас кәсіпкер Әсетханды әңгімеге тартқанымызда: — Бұл жағажайды жабдықтау көптен бері ойластырып жүрген істердің бірі еді. Осы ұсынысымды қолдаған ел ағаларына алғысым шексіз. Алдағы уақытта жағажайға құм төселіп, айналасына арнайы қатқыл жол салу да ойымызда бар. Сонымен қатар кәсіпкерледі осы жерге тартпақпыз,- деді. Әсетханның ата-анасы Ахмет ағамыз бен Рая апамыз халыққа қызмет көрсетуде ел алғысына бөленіп жүрген жандар десек артық болмас. «Әке көрген оқ жонар, шеше көрген тон пішер» — демекші, ата-анасы бастаған кәсіпті жалғап жатырған Әсетханның бастамасына сәттілік тілейік!

Қайрат ЖАҚЫП


ИГІ ІС ЖҮЗЕГЕ АСТЫ

Күні: , 14 рет оқылды

Елбасымыздың «Рухани жаңғыру» бағдарламасы аясында ауданымыздың туған перзенттері игі істер жасаудан облысымыз бойынша көш бастап тұр. 30 тамыз күні Бостандық ауылының тұрғындары тағы да бір игі істің куәсі болды. Ата заңымыз – Конституция күні Бостандық аулының тумасы, мемлекет және қоғам қайраткері Қабира Салықоваға бюст қойылып, ауылдың тарихы мен табиғатынан сыр шертер өлкетану музейі ашылды. Қос оқиғаның орын алуына Құқық қорғау саласының ардагері, Қабира Салықованың ұлы Ғиният Салықов мұрындық болып, музейдің ашылуына 1,5 млн теңге қаражатын беріп, бюст жасатып, музейге жәдігерлер тарту етті. Сонымен қатар музейдің жөндеу жұмыстарына ауылдың азаматтары да атсалысқан болатын. Қабира Салыққызына арналған бюсттің ашылу салтанатына аудан әкімі Абат Шыныбеков, апамыздың ұлы Ғиният Салықов және ауыл тұрғындары қатысты.
Шарада сөз алған аудан басшысы бостандықтық ағайынды Конституция күнімен құттықтап, игі іс бастаған Ғиният ағамызға елдің атынан алғыс білдірді. Қоғам қайраткерінің бюстіне гүл шоқтарын қойғаннан кейін, жиналған көпшілік музейдің ашылу салтанатына қатысты. Айта кету керек, бұл музейде бір зал түгелімен Қабира Салыққызына арналған. Сол кісінің отырған үстелінен бастап, қолданған заттары осы залда қойылған. Сондай-ақ залда апамыздың өмірі ғана емес қазақ зиялыларының өмірінен мол мағлұмат беретін фото суреттер көрмесі бар. Музейде Қабира Салыққызының жеке кітапханасынан алынған кітаптарды да көруге болады. Шаруаның бас-қасында жүрген округ әкімі Манарбек Сүндетов,- Жаңадан ашылған музейге ауыл тарихы баяндайтын экспонаттар жинақталу үстінде, қосымша екі зал тағыда ашамыз,- деген болашақ жоспарымен бөлісті. Міне, Қазталов ауданында тағы да бір игі іс жүзеге асты. Көпшілікке үлгі болар осындай істеріміз көп болғай.

Қайрат ЖАҚЫП


НҰРСАЙДА «ЕР ЕСІМІ – ЕЛ ЕСІНДЕ!» АТТЫ МЕМОРИАЛДЫҚ ТАҚТА АШЫЛДЫ

Күні: , 10 рет оқылды

Бүгін қазақ елінде мерейлі мереке. Тәуелсіздіктің төлқұжаты іспетті Конституциямыздың мейрамы. Тұғырлы тәуелсіздігіміздің , еңселі егемендігіміздің тірегі болған Ата Заңымыз сіз бен біздің құқығымызды қорғап, тең өмір сүруімізді қамтасыз етіп келеді. Осы Ата Заң күні Тереңкөл ауылдық округінің орталығы Нұрсай ауылында майданға аттанған барлық жауынгерлердің есімі жазылған даңқ мемориалы ашылды. Ашылу салтанатында округ әкімі Ернар Ғалымов сөз сөйлеп, барша халықты мерекемен құттықтады. Аудандық мәслихат хатшысы Сәрсембай Молдашев пен ауыл ақсақалы Едіге атамыз мемориалдық ескерткішті ашса,ардагерлер кеңесінің төрағасы Уәлиолла Әбішев пен Абуғали Ғұмаров мәңгілік алауды жағып, елді қуаныштарымен құттықтады. Елбасымыздың «Болашаққа бағдар:рухани жаңғыру» мақаласынан туындайтын «Туған жер» бағдарламасы аясында осыған дейін «Менің жүрегім – Нұрсай» композициясы мен тарихи-өлкетану музейі ашылған болатын. Енді мені бұл жобалардың қатары мемориалды тақтамен толығып отыр. Ескерткіш тақтаға 334 жауынгердің аты-жөні қашап жазылып отыр. Әлі зерттеу жұмысы жүргізіліп жатыр, алдағы уақытта бұл тізім толығуы әбден мүмкін. Мемориалды тақтаны орнатуда ел азаматтары, меценат Абуғали Ғұмаров пен Дамир Балмулдин өз ықпалдарын тигізіп, ел алғысына бөлінуде.

Гүлнұр ҚАЗБЕК


МЕРЕКЕДЕГІ ҚОС ҚУАНЫШ

Күні: , 8 рет оқылды

Елбасымыз өзінің жариялаған «Болашаққа бағдар: рухани жаңғыру» атты бағдарламалық сипаттағы мақаласында «Туған жер» бағдарламасын қолға алуды ұсынды. Мемлекет басшысы отансүйгіштік сезімнің кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталатынын қадап айтқан болатын. Ұлт көшбасшысының саясатына қолдау көрсеткен Жұлдыз ауылының тұрғындары Ата Заңымыздың мерекесінде қос қуаныштың куәсі болды. Ауыл мектебін 2008 жылы бітірген түлектер ауылға кіреберіс жолға атау белгі орнатса, туған жерін түлетуге үлес қосқан ауыл тұрғындары ойын алаңында субұрқақ орнатып, туған жерлеріне тамаша тарту жасады. Қаймағы бұзылмаған Сарыөзеннің жағасында орналасқан Жұлдыз ауылы қос нысанмен толықты. Мектеп бітіргендеріне 10 жыл болған, 1990 жылы туған түлектер аудан орталығымен қатынайтын күре жолдың бойынан ауылға кіреберіс тұста ұлттық ою-өрнекпен безендірілген «Жұлдыз. Қош келдіңіздер» деген белгіні 600 мың теңгеге орнатса, ауыл тұрғындары балалар ойын алаңын былтырғы жылы өздері жасақтап, биыл сол ойын алаңына 400 мың теңге көлемсінде қаржы шығарып субұрқақ орнатып, айналасына орындықтар жасады. 30 тамыз күні қос нысанның ашу рәсімі оздырылды. Бұл қуанышты күнді бөлісуге аудандық «Нұр Отан» партиясы филиалы төрағасының бірінші орынбасары Ерболат Бекмулдин келіп, жұлдыздықтарды Конституция күнімен құттықтап, игі тілегін арнады. -Ата Заңымыздың мерекесінде қос қуаныштың куәсі болып тұрмыз. Мереке күніндегі қуаныштарыңыз құтты болсын. Елбасымыздың «Туған жер» бағдарламасына өз үлестерін қосамын дейтін әр ауыл-аймақтағы түлектердің қарасы көбейіп, бұл игі дәстүр әрмен қарай өз жалғасын таба бергей. Биылғы жылы 37 жоба қолға алынып, 82 млн теңге көлемінде қаржы жинақталған болатын. Тағы да мерекелеріңіз құтты болып, ауылымыз ажарлана берсін,-деп игі тілегін арнады Ерболат Мұратқалиұлы. Мұнан кейін Қарасу ауылдық округінің әкімі Эдуард Ешмұқанов, А.Хұсайынов атындағы орта мектептің директоры Асхат Нұржанов ауыл тұрғындарын Ата Заңымыздың 23 жылдығымен құттықтап, 1990 жылы дүние есігін ашқан түлектерді және субұрқақ орнатуда үлестерін қосқан бір топ азаматтарын алғыс хатпен марапаттады.

Тұрарбек АҚМЫРЗА


«АЗАТ ЕЛДІҢ АР-НАМЫСЫ – АТА ЗАҢ»

Күні: , 8 рет оқылды

Мемлекет басшысы Н.Ә.Назарбаев өзінің «Қазақстан жолы» атты кітабында: «Тәуелсіз Қазақстанның Конституциясы ашық және демократиялық қоғам орнатудың негізгі принциптерін баянды етуге тиіс болатын» — деп жазды. Қазақстанның Ата заңы әлемдегі ең жас Конституциялардың бірі. Бүкіл мемлекеттік құрылымды айғақтайтын, елдіктің бастауы болып саналатын құжат 30 тамыз күні 23 жасқа толмақ. Осы орайда 29 тамыз күні аудандық мәдениет үйінде Конституция күніне арналған «Азат елдің ар-намысы – Ата заң» атты салтанатты шара өтті. Салтанатты шараның шымылдығы Ата заң туралы бейнеролик көрсету арқылы ашылып, Қазақстан Республикасының Гимні орындалды. Шарада сөз алған Қазталов ауданының әкімі Абат Шыныбеков,- Биыл 23 жыл толып отырған Конституция тәуелсіз мемлекет ретінде дамуымызға даңғыл жол болып, елдің бетке алған бағдарының тұтас бөлігін қамтып отыр. Оның айғағындай Қазталов ауданында да ілгерілеу мен дамудың көрінісіне баршамыз куә болып отырмыз. Ауданымыз бойынша атқарылып жатырған ауқымды істердің барлығы осы Ата заңның шеңберінде орындалып жатыр. Баршаңызды осы тамаша мерекемен тағы да құттықтап, денсаулық пен бақыт, отбасыларыңызға түсіністік, береке-бірлік және қуанышты күндер тілеймін!- деген тілегін жеткізіп, мерекелік марапатқа ұсынылған бір топ қызметкерлерге алғысхаттар табыс етті. Сонымен қатар аудан әкімі мереке қарсаңында Қазақстан Республикасы азаматының жеке күәлігін салтанатты түрде кәмелет жасқа толған жастарға табыстады. Шарада аудандық ардагерлер кеңесінің төрағасы, билер кеңесінің мүшесі Уәлиолла Әбішев құттықтау тілегін жеткізсе, Конституция күні дүниеге келген Алма Оразбаева атындағы орта мектебінің 8 а сыныбының оқушысы Аружан Хайрукова мерекелік құттықтауын оқыды. Салтанатты шараның соңы аудан көркемөнерпаздарының мерекелік концертіне ұласты.

Қайрат ЖАҚЫП


АТА ЗАҢ КҮНІ АТАЛЫП ӨТТІ

Күні: , 8 рет оқылды

29 тамыз Жалпақтал ауылдық мәдениет үйінде Ата заң күні аталып өтті. Салтанатты шарада аудан әкімі Абат Шыныбеков: — Конституция мемлекетті шын мәніндегі бақытты қоғамға бастауға қабілетті құндылықтарды өмірге әкелуге қуаты мен ықпалы жетерлік тарихи құжат. Мұнда мемлекеттік басқару мен бұқаралық биліктің үйлесімді түрде ұштасуы бар. Еліміздің Ата Заңы қоғамдық құндылықтың алтын арқауы және мемлекеттік биліктің бастауы. Ата Заң – бізді өткенмен де, болашақпен де байланыстырып тұрған алтын арқау іспеттес. Оның тұтас болмысынан мемлекетіміздің мерейі мен халқымыздың қалауы менмұндалайды. Еліміздің Ата Заңы мемлекетіміздің бүгінгі құрылымын шынайы бейнеленген, ұлттық мақсатты айқындап берген темірқазық. Келе жатқан мереке құтты болсын, жерлестер! – деп өз құттықтауын жеткізді. Сонымен қатар Ата заң күніне тұспа-тұс келіп, шаңырақ көтеріп жатқан жастарға неке куәлігі табыс етілді. Салтанат шара соңы мерекелік концертке ұласты.

«Ауыл айнасы» ақпарат


Қазталов ауданы, Шарафутдинов көшесі 13
zhaik_presscenter@mail.ru
aulainasi@mail.ru

"Ауыл айнасы"

"Ауыл айнасы" газетінің бас редакторы: 8-71144-31-4-68
Тілшілер: 31-4-68, 21-3-70
Жарнама бөлімі: 21-0-42

 

.