АЙМАҚ

СПОРТ

ҚОҒАМ

Құттықтаулар


САЛЫҚ КОДЕКСІНДЕГІ ӨЗГЕРІСТЕР ТҮСІНДІРІЛДІ

Күні: , 10 рет оқылды

Елімізде 2018 жылдың 1-ші қаңтарынан бастап «Салық және бюджетке төленетін басқа да міндетті төлемдер туралы салық кодексі» күшіне енген болатын Бұл жаңа кодекс көптеген елеулі өзгерістер мен толықтырулармен қамтылған. Осыған орай 16 ақпан күні жаңадан қабылданған салық кодексін түсіндіру мақсатында БҚО бойынша мемлекеттік кірістер департаментінің түсіндіру жұмыстары басқармасының басшысы Ж.Сағынов, БҚО бойынша мемлекеттік кірістер департаментінің мемлекеттік қызмет көрсету басқармасының басшысы Т.Төлеповтің қатысуымен семинар-кеңес өтті. Семинар-кеңеске аудан әкімінің орынбасары Нұретден Құтхожин, салалық мекеме басшылары, ауылдық округ әкімдігінің мамандары, есепшілер мен шара қожалық жетекшілері және кәсіпкерлер қатысты. Семинарда БҚО бойынша мемлекеттік кірістер департаментінің түсіндіру жұмыстары басқармасының басшысы Ж.Сағынов салық кодексіне енгізілген өзгерістер жөнінде кеңінен түсіндірсе, БҚО бойынша мемлекеттік кірістер департаментінің мемлекеттік қызмет көрсету басқармасының басшысы Т.Төлепов арнаулы салық режиміндегі патенттік жүйе, оңайлатылған декларация, міндетті әлеуметтік медициналық сақтандыру мәселелері туралы баяндады. Мәселен, жаңа салық кодексі барлық түсініксіз баптар салық төлеушінің пайдасына шешіліп және салықтық дауларды әділ қарауға мүмкіндік бермек. Мысалы, бұл кодекс бойынша салық төлеуші салық органының түсіндіруіне сәйкес әрекет еткен жағдайда, айыппұлдар мен өсімпұлдар қолданданылмайды. Сондай-ақ мұнда аграрлық секторға ынталандыру шаралары да ұсынылған. Яғни, шаруа-фермер қожалықтарында мүшелері мен жұмысшыларына салынатын әлеуметтік салық алынып тасталынған. Бұл Салық кодексінің бұрынғылардан негізгі өзгешілігі, артық кедергілерден арылып, қарапайым халық мүддесін қорғауға басымдық берілуінде. Мәселен, бұған дейін 2017 жылдың мүлік және көлік салықтарын сол жылдың 1 қазанына дейін төлеу керек болатын. Енді жыл қорытындысы бойынша төлейсіз. Бұдан бөлек қарызды кешіру кезінде жеке табыс салығы алынып тасталды. Сонымен қатар салықтық тексерістер саны азаяды. Семинарда оңайлатылған салық режимі бойынша ауыл шаруашылығы өнімін өндірушілер үшін арнаулы салық режимі, кассалық бақылау машинасы, тіркеуге байланысты өзгерістер, қосылған құн салығы бойынша енгізілген өзгерістер, акцизделетін тауарлар бойынша өзгерістер т.б кең көлемде түсіндірілді. Семинар-кеңес соңында қатысушылар тарапынан сұрақтар қойылып, тұщымды жауаптар алынды.

Мөлдір ӘНУАРБЕКҚЫЗЫ


«АРДЫ ОЙЛАҒАН АЗАМАТ»

Күні: , 14 рет оқылды

14 ақпан күні аудандық мәдениет үйінде ауданымыздың құрметті азаматы, ауыл шаруашылығы ғылымдарының кандидаты, «Құрмет» орденінің иегері Абат Кадемұлы Есенғалиевтің 70 жасқа толу құрметіне орай «Арды ойлаған азамат» атты ұлықтау кеші өтті. Еңбек жолында Абат Есенғалиев ірі лауазымды қызметтер атқарды. Абат Қадемұлының туған жері – Жаңақала ауданы, Айдархан ауылы. Әке-шешесі дүниеден ерте озғандықтан, алты жасар баланы Ресейдің Саратов облысы, Александр-Гай ауданында тұратын әкесінің інісі Бақыт Есенғалиев қолына алып, қамқорлайды. Балалық шағы туған жерімен шекаралас Алғайда өткен бозбала елге оралып, Қазталов ауданындағы Алма Оразбаева атындағы мектебінің 11сыныбында оқиды. Мектеп түлегі 1965 жылы Ресейдің Саратов малдәрігерлік институтына оқуға түсті. Институтта білім алғаннан кейін жолдамамен Қазталов ауданында еңбек жолын бастады. Іскер азамат Қазталов ауданында қызмет істеген жылдары ауыл шарушылығын дамытуға зор үлес қосты. Абат Қадемұлы осындай іскерлік қабілетінің арқасында облыстық деңгейдегі жоғарғы қызметтерді абыройлы атқарды. 1992-1994 жылдары Орал облыстық әкімшілігі басшысының бірінші орынбасары қызметін атқарса, еліміздің Жоғары Кеңесінің депутаты болып та сайланды. Абат Қадемұлы облысымыздың басқару саласында жүргенде ауыл шаруашылығы іргелі дамыды. Ал осы атқарылған, бүгінгі күнде өз нәтижесін беріп жатқан жұмыстарда бұл азамат ағаның өзіндік қолтаңбасы қалды. Мәселен, 1990-93 жылдары Ақ Жайық өңірінде 1,5 млн. га жерге дәнді дақылдар егіліп, жақсы өнім алынса, ол егістік алқаптың көлемі 250 мың гектарға дейін кеміген еді. Егістік науқанына тұқым әзір болмады. Осыны көре білген білікті басшы құзырлы құрылымдар алдында мәселе көтеріп, облыс бюджетінен ауыл-аймақ деңгейін көтеруге 1 млрд. теңге көлемінде қайтарымды қаражат бөлгізіп, шаруаларға қолдау жасады. Төрт түлік санағы жүргізілді. Малдәрігерлік коммуналдық мекемелері құрылды. Облыстағы зауыттар арқылы ауыл шаруашылығына керекті қосалқы бөлшектер мен қондырғылар шығару жолға қойылды. Соның нәтижесінде 2004 жылы егістік көлемі 700 мың гектарға дейін ұлғайды. Сонымен қатар Абат Қадемұлы бастаған облыс бойынша ауыл шаруашылығы мақсатында пайдаланылатын жерлерді суландыру-суғару жүйесін дамыту да іске асырылды. Ал бүгінгі күнде бұл жұмыс қарқынды дамып келе жатқаны мәлім. Жетпіс жасты алқымдаса да, Абат ағамыз әлі тың. Ұлықтау кешінің алдында облыстық «Aqjai’yq» арнасы түсірген «Арды ойлаған азамат» деректі фильмі жиналған көпшілікке ұсынылды. Мерейтой иесін аудан әкімі Абат Шыныбеков құттықтап, облыс әкімі Алтай Көлгіновтің құттықтау хатын оқып берді. Сонымен қатар мерейтой иесіне иығына шапан жапты. Сондай-ақ облыстық деңгейдегі ұйымдар атынан құттықтау хаттар табысталды. Ұлықтау шарасында Абат Қадемұлымен қызметтес болған аға-апалар жүрекжарды тілектерін жеткізді. Сондай-ақ ауданымыздың сыйлы азаматы Жасұлан Байғонақов ел сыйлаған абзал азаматқа сәйгүлік міңгізді. Осы бір өткен мерейтой шарасында сөз алған Абат Қадемұлы: -Мен қандай лауазымды қызметте болсам да, халқыма қызмет етуді мақсат еттім. Сол мақсат жолында бойымдағы барлық күш-жігерімді аямадым. Туған елден құрмет алу — адамның ең биік шыңы болып табылады ғой. Сол құрметті бүгін мен туған жерімнің халқынан көріп отырмын. Ал бұдан асқан маған бақыт жоқ. Сондықтан өзімнің өмірдегі бүкіл жинаған тәжірибемді бүгінгі елімізде жасампаз істермен айналысып жатқан жастарға үйрете беруден жалықпаймын, -деп жүрекжарды тілегін айтты. Елі сыйлаған азаматтың мерейтойы Қазақстан Жазушылар және Журналистер одағының мүшесі, облыстық «Орал өңірі» газетінің бас редакторы Бауыржан Файзоллаұлының мазмұнды бағдарламасымен жүргізіліп, ұлттық бағыттағы әндермен өріліп отырды. Бұндай шараның бүгінгі жас ұрпақтың бойына отансүйгіштікке, туған елге деген патриоттық сезімінің қалыптасуына әсер етері сөзсіз.

Гауһар ӘДІЛЖАН, Әсем БОЛАТ


АУЫЗ СУ УАҚЫТПЕН БЕРІЛЕТІН БОЛАДЫ

Күні: , 4 рет оқылды

13 ақпан күні аудандық коммуналдық шаруашылық жүргізу құқығындағы кәсіпорны мекемесінің басшысы Әділжан Өтебаев және Қазталов ауылдық округі әкімі Жүсіп Шакуов аудан орталығында қалыптасқан ауыз су мәселесіне орай брифинг өткізді. -Қазіргі таңда Қазталов ауылында ауыз су қысымының азайып кеткені белгілі. Баршаға аян, таза ауыз су аудан орталығына Лекер су қоймасынан тартылады. Бұл су жүйесі құбырының ұзындығы 14 шақырымды құрайды. Су мұнарасынан сағатына 10 текше метр, ал тәулігіне 240 текше метр су өндіріледі. Бұл судың 180 текше метрі су мұнарасы арқылы тұрғындарға, 15 текше метрі тікелей құбырмен ауруханаға, 15 текше метрі су таситын көліктер арқылы тасымалданса, ал қалған 30 текше метрі Әжібай ауылына беріледі. Яғни, тәулігіне өндірілген су толығымен шығындалуда. Сонымен қатар өткен жылы аудан орталығына «Ақбұлақ» бағдарламасы арқылы таза ауыз су тартылды. Салыстырмалы түрде қарасақ, 2017 жылдың осы маусымында аудан орталығындағы су құбыры тартылған аула саны 440 болса, ал 2018 жылы аула саны 1200-ге жеткен. Сәйкесінше, таза су тұтынушылар саны 3 есеге артты. Сол себептен де аудан орталығында таза суға қосылған үйлердегі, әсіресе Шарафутдинов, Лұқманов, Жангелдин көшелеріндегі үйлердегі судың қысымы мүлдем төмен. Осыны ескере келе жақында қоғамдастық өкілдерімен кездесу өткізіп, ақылдасып, суды белгілі бір уақытпен беру туралы шешім қабылданды. Су енді 19 ақпаннан бастап тұрғындарға қолайлы таңғы, түскі және кешкі уақыттарда берілетін болады. Ал бұл қалыптасқан су қысымының төмендігі мәселелесін шешу мақсатында қосымша екінші құбыр тарту үшін жобалық-сметалық құжат дайындалып, ол аяқталуға жақын. Бұл жоба іске асқан жағдайда су мәселесі бір шешімін табады деп санаймыз. Ал судың берілу уақытының кестесі әлеуметтік желіде және газет бетінде жарияланады, -деді кәсіпорын басшысы Әділжан Өтебаев. Брифинг барысында осы және басқа да қойылған сұрақтарға жауаптар қайтарылды.

Мөлдір ӘНУАРБЕКҚЫЗЫ


КИІКТІ ЕЛ БОЛЫП ҚОРҒАЙЫҚ!

Күні: , 4 рет оқылды

12 ақпан күні Қазталов ауданы орталығында аудан әкімдігі, аудандық прокуратура, жергілікті полиция қызметкерлері, округ әкімдері және салалық мекеме басшыларына «Охотозоопром» ӨБ» РМҚК-ның бөлім басшысы Нұрбек Бекмановтың, осы мекеменің ғылыми қызметкері Бақтияр Ташеновтың, сондай-ақ инспекторлар А.Гринчинның және С.Сачаваның ұйымдастыруымен кездесу өткізілді. Кездесу барысында Елбасымыздың «Болашаққа бағдар: рухани жаңғыру» бағдарламасы аясында «Киіктерді ұрпаққа сақтайық!» атты тақырып бойынша киікті ел болып қорғаудағы өзекті мәселелер көтерілді. Жиын да сөз алған Бақтияр Ташенов ауданымыздағы табиғат байлығы киіктерді зерттеу және зерделеу туралы тағылым болатындай ақпараттармен таныстырды. Соның ішінде 2017 жыл санағы қорытындысы бойынша ауданымызда 98 мыңнан астам киіктердің бар екенін хабарлады. Бұл дегеніміз, еліміздегі киіктердің 80 пайызы Батыс Қазақстан облысы жерінде мекен ететіндігін көрсетіп отырғандығын атады. Киік санының көбеюіне аудан көлемінде және тыс жерлерден келетін түрлі қаскөйлердің бас көтеруі кедергі келтіріп, осы жағдайдың алаңдатушылық туғызып отырғанын атап айтты. Мысалы, тек киік бойынша 2017 жылда аудан көлемінде бірнеше қылмыстық іс қозғалған екен. Қаскөйлердің бұл қылмыстары үшін ҚР-ның заңнамасы бойынша мемлекетке келтірген залалын өтеу үшін қылмыскердің басындағы мүлкін тәркіленіп, бас бостандығынан айырылатындығы айтылды. Сондай-ақ болашақта қылмыскердің қара басына ғана емес, сонымен қатар балаларына зардап келетіні атап көрсетілді. Жиынның соңында Бақтияр Ташенов,- киікті ел болып қорғасақ қана даламыздың еркесін болашақ ұрпаққа сақтай аламыз! -деп тұжырымдады сөзін.

Қайрат ЖАҚЫП


АРДАГЕРЛЕР ОЙЛАРЫН ОРТАҒА САЛДЫ

Күні: , 4 рет оқылды

12 ақпан күні аудандық ардагерлер кеңесінің Пленумы өтті. Пленумға аудан әкімі Абат Шыныбеков, ауылдық округ әкімдері, ардагерлер бастауыш ұйымының төрағалары мен қоғамдық ұйым және салалық мекеме жетекшілері қатысты. Кездесуде аудандық ардагерлер кеңесінің төрағасы Уәлиолла Әбішев Елбасы Н.Назарбаевтың «Болашаққа бағдар: рухани жаңғыру» атты еңбегінен туындайтын ардагерлер кеңесі бастауыш ұйымдарының алдына тұрған міндеттер туралы баяндама жасап, биылғы жылғы алда тұрған міндеттерге тоқталды. -Ардагерлердің алдында болашақ қоғам үшін маңызды мәселелер әлі де көп. Солардың бірі еліміздегі той мәдениетін, өлім жөнелту дәстүрін қалыптастыру мәселесі, яғни ысырапшылдық пен астамшылыққа жол бермеу. Ардагерлер ұйымдары болашақта үгіт-насихат жұмысын жүргізудің үш бағыты бойынша, атап айтқанда «Дәстүр мектебі», «Алтын ұя мектебі», «Ағаның ақылы» бағыттары бойынша жұмыстар жүргізу міндеттері тұр. Осы жұмыстарға ардагерлер ұйымдарымен бірлесе отырып, мемлекеттік органдар, саяси партиялар бірге жұмыстанады деп санаймын, — деді. Отырыста сөз алған еңбек ардагері Кәрім Өтеғұлов рухани жаңғыру аясында қағазбастылыққа салынбай, негізінен жастарға ұлттық құндылықтарды бойына сіңіру бағытында жанды жұмыстар жасауына көңіл бөлу қажеттігін айтып өтті. Отырыста аудандық ішкі саясат бөлімінің басшысы Самал Жангереева, Бостандық ауылдық округінің әкімі Манарбек Сүндетов ардагерлермен атқарылып жатырған жұмыстар жөнінде хабарламалар жасады. Сондай-ақ Пленумда аудандық ардагерлер кеңесінің төрағасының орынбасары болып Гүлжиян Измағұлова сайланды. Отырыс соңында қоғамдық жұмыстарға белсене араласқан бір топ ардагерлерге алғыс хаттар табысталды.

Жұлдыз АСҚАР


ҮКІМЕТТІК ЕМЕС ҰЙЫМДАР БАС ҚОСТЫ

Күні: , 4 рет оқылды

12 ақпан күні «Нұр Отан» партиясы аудандық филиалының мәжіліс залында аудандық ішкі саясат бөлімінің ұйымдастыруымен «Азаматтық бастамаларды іске асыруда үкіметтік емес ұйымдардың белсенділігін арттыру» тақырыбында үкіметтік емес ұйымдардың өкілдерімен кездесу өтті. Кездесуде қоғамдық сананы жаңғыртудың жолдарын, басқа да қоғамдағы түйткілді мәселелерді шешуге байланысты пікірталастар мен оларды оң шешуге бағытталған шаралар туралы ой-пікір, ұсыныстарын айтты. Кездесу барысында аудандағы үкіметтік емес ұйымдардың рөлі туралы аудандық ішкі саясат бөлімінің басшысы С.Джангереева баяндама жасап, аудандық ардагерлер ұйымының төрағасы У.Əбішев, еңбек ардагерлері Н.Ризуанов, Т.Мұқанов өз ойларын ортаға салды. Кездесуде үкіметтік емес ұйымдардың қаржыландыру, «Рухани жаңғыру» бағдарламасы аясында атқарылған жұмыстарды дер кезінде жарыққа шығару мәселелері көтерілді. Жиында сөз алған аудан әкімі Абат Шыныбеков аудандағы үкіметтік емес ұйымдардың ролі туралы, ауданда банктер, кәсіподақтар жұмысын жандандыру, аудандағы діни ахуал, теолог маманның тапшылығы, газет қызметкерлері жұмысы, блогерлер тапшылығы туралы пікірін білдірді. Аудандық аналар кеңесінің төрайымы Н.Хабибуллина қоғамдағы отбасы құндылықтарын арттыру туралы, Жалпақтал мешіт имамы Т.Нұрғалиев ауылдық округтерде діни мамандар тапшылығы, оларды даярлау туралы, аудандық қоғамдық кеңес төрағасы С.Нығметов отбасы тәрбиесі, мал ұрлығы ауыздықтау туралы өз ойын ортаға салды.

Жұлдыз АСҚАР


ЖАЛПАҚТАЛДА ЖАҢА МАЛ СОЮ АЛАҢЫ АШЫЛДЫ

Күні: , 10 рет оқылды

Жалпақтал ауылында модульді мал сою алаңы ашылды. «Ынтымақ» несиелік бағдарламасы бойынша Ауыл шаруашылығын қаржылай қолдау қоры» АҚ ұсынған кепілсіз несие көмегімен үш ай ішінде тұрғызылған нысан – «Жалпақтал» АӨК мүшелеріне ғана емес, барша ауыл тұрғындарына қызмет көрсетеді. Шыны керек, ауылда ашылған заманауи мал сою алаңының маңызы өте зор. Ауылда мал баққан шаруа енді бірлі-жарым малын саудалау үшін қалаға барып сандалып жүрмейді. Оның үстіне мал сою бекеті жанында болашақта – шұжық, ет цехы және асханасы мен қонақ үйі болмақ. Мал сою алаңының ашылу рәсіміне қатысқан аудан әкімі Абат Шыныбеков кәсіп иелерін ашылу салтанатымен құттықтады. -Елбасымыз биылғы жылдың 10 қаңтарында Қазақстан халқына арнаған өзінің Жолдауында елдің дамуының жақсартуда мемлекет алдындағы жаңа он міндеттерді айқындап берген болатын. Осы құжаттың үшінші міндетінде агроөнеркәсіп кешенін қарқынды дамыту мүмкіндіктері қарастырылып, ауыл шаруашылығы субъектілерінің кооператив түрінде жұмыс істеуіне жан-жақты қолдау көрсету, шикізатты қайта өңдеуді қамтамасыз ету, әлемдік нарықтарға жоғары сапалы дайын өніммен шығуымыз қажеттігін атап көрсеткен болатын. Тәулігіне 10-15 бас ірі қара малын соятын модулдік мал сою пунктінің құрылысы өткен жылдың қараша айында басталып, қысқа мерзім ішінде пайдалануға беріліп отыр. Бұ ауыл тұрғындарының қуанышы, баршамыздың қуанышымыз. Жаңадан ашылған модульдік мал сою пунткінің жұмысы жанданып, тұрғындарға қызмет көрсетуде жаңа жетіктіктерге жете берсін,-деді аудан басшысы Абат Абайұлы. Жаңадан пайдалануға беріліп отырған модульді мал сою пунктінің құрылысы қараша айында басталған. Тез құралатын қабырғалардан тұрғызылған қасапханада тәулігіне 10-15ірі қара союға болады. Ет сақтайтын тоңазытқышы және бар. «Ынтымақ» несиелік бағдарламасы бойынша Ауыл шаруашылығын қаржылай қолдау қоры» АҚ ұсынған 19 млн.700 мың теңге несие алған. Жаңа орынның тұсауы кесіліп, келген меймандар шаруашылық тынысымен танысты. Ахметқали ҚАРАҒОЙШИН, «Жиенбай» ЖШС-нің басшысы: — Кеңес дәуірінде құрылған Жалпақтал ауылындағы еткомбинаты тәуелсіздіктің алғашқы жылдарында жұмысын тоқтатқан еді. Енді міне шағын ғана мал сою алаңы бүгін өз жұмысын бастады. Елдегі ырыс-берекенің, осындай мүмкіндіктің бәрі еңбектің арқасында келеді. Дархан Догоров, «Жалпақтал» ауыл шаруашылығы өндірістік кооперативінің төрағасы: -Бүгінгі таңда мемлекет ұсынып отырған жеңілдетілген несиелер біз сияқты кооперативтерге үлкен мүмкіндік береді. Қазірдің өзінде бастаған ісіміздің болашағы зор екенін байқап отырмыз. Мал сою пунктіміз санитарлық талаптарға сай.

Тұрарбек ҚАЙЫРҒАЛИ


ҚАЗТАЛОВ-ОРАЛ МАРШРУТЫ АЛҒАШҚЫ РЕЙСІН БАСТАДЫ

Күні: , 22 рет оқылды

12 ақпан күні Қазталов-Орал маршрушты бойынша қатынайтын жолаушылар автобусының алғашқы рейсіне ашылуына орай шара өтті. Шара да сөз алған аудан әкімі Абат Шыныбеков: — «Жиенбай» ЖШС-ы Қазталов және Жалпақтал ауылдарының тұрғындарын 28 орындық микроавтобус көлігімен жолаушыларды тасымалдауын бастады. Бұл облыс орталығымен аудан тұрғындарының қатынау мақсатында Батыс Қазақстан облысының жолаушылар көлігі және автомобиль жолдары басқармасымен келісіп, аудандық тұрғын үй-коммуналдық шаруашылығы және автомабиль жолдары бөлімі тендер жасаған кезде «Жиенбай» ЖШС-гі ұтып алды. Ендігі мақсат аудан тұрғындары болып, қолдау көрсету. Барша жолаушыларға сәтті сапар,-деді. Сонымен қатар шарада «Жиенбай» ЖШС-ның басшысы Ахметқали Қарағойшин де сөз алып, құттықтау тілегін жеткізді. Сондай-ақ аудан әкімі Абат Абайұлы «Жиенбай» ЖШС-ны өткен жылы өткізліген республикалық «Парыз-2017» конкурсының дипломымен марапаттады. Шара барысында облыс орталығына жүргелі тұрған №211 маршрутына Бостандық ауылдық бастауыш ардагерлер кеңесінің төрағасы Серікбай Жапақов лебізін білдіріп, ақ батасын берсе, ауданды мәдениет үйінің өнерпаздары Ж.Хайрушев пен Б.Сәртөк «Жолың болсын, жолаушы!» әнін орындады. 28 орындық микроавтобустың бүгінгі рейсінде 12 адам облыс орталығына аттанды. Осы автобуспен бара жатқан ауылымыздың «Алтын алқа» иегері Фариха Есенғалиеваға жеңілдік жасап, тегін билет берілді.

Гауһар ӘДІЛЖАН


ХАЛЫҚТЫ ЖҰМЫСПЕН ҚАМТУ ОРТАЛЫҒЫ ЖАҢА ФОРМАТТА ЖҰМЫС ЖАСАУДА

Күні: , 16 рет оқылды

Елімізде халықты жұмыспен қамту, сол арқылы олардың тұрмысын жоғары деңгейге көтеру — басты міндет болып табылуда. Бұл орайда Елбасымыздың халыққа арналған Жолдауларында айтылып, тиісті тапсырмалар да жүктеліп отыр. Ауданымызда да халықты жұмыспен қамтуда іргелі істер атқарылып жатыр. Өткен жылы халықты жұмыспен қамту орталығы заманауи жөнделген, тұрғындарға сапалы қызмет көрсете алатын ғимаратқа көшті. Бұған аудан әкімі Абат Шыныбеков үлкен қолдау жасады. Нәтижесінде ауданымыздың халықты жұмыспен қамту орталығы облыс бойынша Орал мен Ақсай қалаларындағы қызмет көрсету түрлері бойынша жетілдірілген орталық болып отыр. Қазіргі күнде орталықта жұмыс іздеушілер мен жұмыс атқаратын арнайы менеджерлер қызмет жасауда. Олардың негізгі қызметтері — жұмыс іздеушілерді жұмыссыз ретінде еңбек нарығы базасына енгізу, профильдеу, жұмысқа орналастыру және жұмыссыздар арасында мониторинг жүргізуді қамтамасыз етеді. Сонымен қатар жұмыс атқаратын промоутер қызметі де бар. Қызмет орталығында арнайы электронды күту залы орнатылып, тұрғындар кезекпен талон алады. Сондай-ақ орталықта жұмыс іздеушілерге арналған өз-өзін басқару аймағы да қызмет атқарады. Бұнда жұмыс іздеушілер мекен-жай анықтамасын, бос жұмыс орындарын және тағы да басқа өздеріне қажетті қызмет түрлерін іздеп, таба алады. Аудандық халықты жұмыспен қамту орталығының директоры Артур Берденов, -Кешегі Елбасының Жолдауында айтылғандай әлеуметтік саясаттың азаматтарды толығымен экономикалық өмірге тарту міндеті тұр. Бұндай бағытта ауданымыздағы жұмысқа орналаса алмай жүрген адамдарды жұмысқа тарту — өте өзекті мәселе болып табылады. Сонымен қатар қай жерден қандай мамандық алуға болатынын туралы және еңбек нарығында қандай мамандықтар сұранысқа ие екенін зерттеп, нақты болжам жасау да біздің міндетіміз. Міне, біз қазіргі күнде осы бір жаңартылған жаңа жұмыс форматы бойынша қызмет істеп жатырмыз, -деді.

Әсем БОЛАТ


БАЛЫҚ АУЛАУДАН САЙЫС ӨТТІ

Күні: , 4 рет оқылды

10 ақпан күні аудандық туризм және экология орталығының ұйымдастыруымен Сарыөзен жағасында балық аулаушылар арасында жарыс өтті. Жарысқа балық аулауға деген қабілеті бар ауыл тұрғындары қатысты. -Балық аулауда тәжірибеміз мол, сондықтан да оны қармаққа түсірудің еш қиындығы жоқ. Балық аулауды жастайымнан кәсіп етіп келемін. Балық аулағанда өзімді сергек сезініп, табиғатта тамаша демалып қаламын. Ірі балық ауыма түсіп жатыр, қуаныштымын, -дейді қайыңдылық Аслан Жайынов. Жарыс соңында қармаққа іліккен балықтың салмағы мен өлшеміне байланысты қазылар алқасы жүлделі орындарды белгіледі. Айта кетер болсақ, 1 орынды Аслан Жайынов, 2 орынды Талапқали Қожанов, 3 орынды Асылбек Қазиуллин алса, басқа да қатысушылар «Жас балықшы», «Ең үлкен балықшы», «Үздік жабдықталған балықшы», «Бірінші балық» номинацияларын иеленді. Салауатты өмір салтын ұстанған басқа балықшылар да назардан тыс қалмай, дипломдармен марапатталды. Халықтың басым бөлігі бос уақытында балық аулаумен айналысады. Біздің мақсатымыз – әуесқой балықшыларды біріктіріп, тамаша демалыс сыйлау, -дейді аудандық туризм орталығының директоры Нұрлан Жасқалиев.

Жұлдыз АСҚАР


Қазталов ауданы, Шарафутдинов көшесі 13
zhaik_presscenter@mail.ru
aulainasi@mail.ru

"Ауыл айнасы"

"Ауыл айнасы" газетінің бас редакторы: 8-71144-31-4-68
Тілшілер: 31-4-68, 21-3-70
Жарнама бөлімі: 21-0-42

 

.